A Xunta xamais mandou non hospitalizar a maiores con coronavirus, insiste o presidente Nuñez Feijóo

132 maiores morreron en residencias, sen ser ingresados en hospital, con coronavirus en Galicia, segundo as cifras oficiais do SERGAS. O presidente insiste, tras as denuncias de familiares de DomusVi San Lázaro e outros centros, que xamais a Xunta mandou non trasladalos a centros médicos, pois se se fixo foi por "prescrición médica".

O presidente da Xunta, Alberto Núñez Feijóo, defendeu este mércores a xestión realizada polo Goberno autonómico nas residencias durante o pico da pandemia e esgrimiu que non houbo "nin a máis mínima estratexia para non derivar aos hospitais" a maiores e que se actuou sempre "de acordo coa prescrición médica".

Unha muller de 100 anos sae da residencia DomusVi San Lázaro tras superar alí o coronavirus

PROPORCIÓN DE MORTES EN RESIDENCIAS
Preguntado polas denuncias contra DomusVi, Feijóo defendeu a xestión das residencias galegas. "Hai 25.000 usuarios e cinco infectados nas nosas residencias. E a nosa porcentaxe de falecementos en residencias é dos máis baixos de España", argumentou.

A continuación, engadiu que nos hospitais galegos "déronse altas a persoas de 107 anos, de 104, de 103 e de 102", antes de defender que "non houbo nin a máis mínima estratexia" para evitar a derivación de maiores a hospitais, seguindo sempre o criterio dos médicos dos centros.

"A NINGÚN FALTOULLE UN RESPIRADOR"
De feito, Feijóo reivindicou que o obxectivo do seu Goberno foi garantir a atención a todos os pacientes e esgrimiu que a ningún dos que o necesitou "faltoulle un respirador".

"Nin os datos de mortalidade, nin os datos de infectados, nin os de supervivencia acreditan nin a máis mínima conduta reprochable neste ámbito", resolveu.