A refinería da Coruña investirá 29 millóns para a amplicación e mellora das súas instalacións
A refinería de Repsol na Coruña iniciou este martes a construción dunha nova unidade de obtención de propileno grao polímero, "que permitirá mellorar a competitividade e eficiencia do complexo industrial", informa.
Os traballos consistirán na instalación, entre outros equipos, dunha columna de preto de 80 metros de altura que se situará na área de Nostián do complexo industrial.
En concreto, explica que este martes realízase o traslado do primeiro dos dous tramos que conforman a columna da nova unidade desde o porto exterior de Langosteira ata o complexo industrial, onde se procederá á súa instalación.
Para a realización deste proxecto a refinería coruñesa inviste 29 millóns de euros "co obxectivo de aumentar a produción de propileno do complexo industrial un 35% e revalorizalo cun aumento da súa calidade en pureza, alcanzando unha produción anual estimada de 81.000 toneladas de propileno en grao polímero".
O propileno grao polímero é utilizado na industria química como materia prima para a elaboración de polipropileno, que, á súa vez, serve como base na fabricación dunha gran variedade de produtos da vida cotiá, como material sanitario papelería, industria téxtil, embalaxes ou envases, entre outros. O prazo previsto para a execución da nova unidade é de oito meses.
Escribe o teu comentario