​(VÍDEO) Así festexan os residentes e traballadores do centro AMICOS superar o coronavirus

19 usuarios do centro e 11 empregados deron positivo por coronavirus o pasado 8 de abril. Un mes despois, e con todos os afectados xa totalmente recuperados da enfermidade, no Fogar de AMICOS celebran a súa vitoria contra o coronavirus.

En AMICOS, asociación de atención a discapacitados no Barbanza, celebran o punto e final deste desagradable episodio cun vídeo publicado no seu perfil de Facebook.

Respectando sempre as medidas de protección, usuarios e traballadores de AMICOS deron as grazas en distintos idiomas a “todas aquelas persoas que dunha forma ou outra colaboraron para lograr que superásemos esta etapa da nosa Asociación”.

Só en Galicia, e atendendo ás cifras arroxadas desde Política Social, hoxe aínda permanecen activos 51 casos de coronavirus de usuarios de centros de atención a discapacitados. A maior parte de casos concéntranse no CAPD da Coruña, con 14 enfermos, e no centro Pai Menni de Betanzos, con 12 contaxiados. Pola súa banda, no referido ao número de traballadores afectados, a día de hoxe son 21 os casos aínda activos na comunidade.