Salto en Santiago de novos casos de coronavirus mentres nas outras áreas baixan ou se manteñen estables

A área sanitaria de Santiago suma 84 novos casos confirmados nun só día. É a segunda cifra máis alta desde o inicio da crise, tras varias xornadas de tendencia positiva. Contrasta coas boas cifras de hoxe do resto de áreas sanitarias.

Ferrol foi a área sanitaria que rexistrou o primeiro contaxio máis tarde, o 9 de marzo. A Coruña, a que máis temperán, o 4 de marzo. En Vigo foi o 5 de marzo.

CASOS CONFIRMADOS  POR ÁREAS SANITARIAS

Segundo reflicten as cifras do SERGAS publicadas este venres, dos 4.635 casos positivos e activos no país;  990 corresponden á área da Coruña; 533 á de Lugo; 694 á de Ourense; 425 á de Pontevedra; 1.049 á de Vigo; 675 á de Santiago; e 269 á de Ferrol.

En número absolutos, Vigo e A Coruña son con moita diferenza as áreas máis afectadas, o que é lóxico debido á súa poboación e densidade urbana.