​Un estudo sitúa a Galicia como a segunda comunidade con mellor saúde mental de España pero na que se prescriben máis tranquilizantes

A Escola Andaluza de Saúde Pública presentou un estudo onde reflicte que a galega é a segunda comunidade onde menos habitantes reflicten algún tipo de trastorno mental cun 10,3% da poboación, só superado por Estremadura, cun 8,6%. Mentres, no lado oposto sitúase Murcia, co 30,8% da súa poboación afectada dalgún tipo de trastorno mental.

O documento, presentado na revista Gaceta Sanitaria, toma os datos dos anos 2006, 2011 e 2017 sobre a morbilidad psíquica dos españois a partir dos publicados pola Enquisa Nacional de Saúde. “Catorce das dezaoito comunidades autónomas viron reducida a súa morbilidad psíquica durante o período analizado”, sinalan desde o estudo, xa que Canarias, Baleares e Navarra copaban os postos máis altos en 2006, mentres que agora son a xa citada Murcia, Andalucía e Valencia.

Con todo, no estudo faise fincapé en que os índices de casos de trastornos de saúde mental cambian con frecuencia, e poñen o exemplo de Cantabria, que de 2006 a 2011 pasou de ser a última en número de casos á primeira.

DIFERENZAS POR SEXOS

“O estudo tamén detectou unha diferenza significativa entre homes e mulleres tanto na morbilidad psíquica como no diagnóstico dalgún problema de saúde mental ou a prescrición de tranquilizantes e antidepresivos. A frecuencia de morbilidad psíquica, por exemplo, foi maior nas mulleres que nos homes nos tres anos analizados: 26,7% vs. 15,3% en 2006; 26,1% vs. 17.5% en 2011, e 22,8% vs. 14,6% en 2017”, reflicten os investigadores como unha constante na maior parte das comunidades autónomas.

No referido á prescrición de fármacos, o estudo indica diferenzas entre comunidades autónomas. Se nos referimos a tranquilizantes, a investigación sinala que “ao 9,2% da poboación española prescribíuselle algún tipo de tranquilizante nas dúas últimas semanas”. Aquí, Galicia sitúase como comunidade coa frecuencia máis alta: “global 20,1%, homes 12,6%, mulleres 26,0%”. Pola súa banda, a medida española de prescrición de antidepresivos situouse no 3,6%, con Galicia como a segunda cos índices máis altos, só superada por Asturias.