O grupo Caamaño doa 250.000 máscaras para sanitarios, policías e gardas civís
Inditex colaborou en liquidar os atrancos loxísticos e burocráticos para traer o material de Asia
A empresa Caamaño Asia, pertencente ao grupo Caamaño, comprometeu a doazón de 250.000 máscaras destinadas á protección do persoal sanitario do Sergas e axentes das forzas de seguridade da área metropolitana da Coruña que están a traballar na loita contra o coronavirus.
En concreto, a empresa fixo entrega da primeira partida de 50.000 máscaras ao Sergas e o xoves chegará unha segunda remesa con 100.000 unidades.
Ademais, segundo informa, iniciou xa os trámites para traer a Galicia 100.000 máscaras máis, das cales a metade se entregará igualmente ao Sergas e a outra metade ás forzas de seguridade da contorna da Coruña, en resposta á demanda trasladada por parte destes colectivos.
Os responsables da empresa agradecen a Inditex a súa axuda en materia loxística e cos trámites de aduana, "que permitiron axilizar o proceso de importación do material sanitario para contribuír a paliar canto antes ás imperiosas necesidades dos profesionais da sanidade".
Pola súa banda, Nortempo, empresa dedicada á xestión de recursos humanos, explica que poñerá ao dispor da rede de centros hospitalarios e residencias da terceira idade de España unha base de datos con perfís especializados en saúde, nas diferentesáreas de interese.
Mentres, debido ao estado de alarma e as medidas para frear o coronavirus, a organización do Salón do Vehículo Usado e de Ocasión Motorocasión, que estaba previsto celebrar no recinto feiral ExpoCoruña, anunciou o seu aprazamento.
Escribe o teu comentario