O Rei renuncia á súa herdanza e quítalle a asignación oficial ao seu pai Juan Carlos
O Rei Felipe VI decidiu renunciar á herdanza de Don Juan Carlos "que persoalmente lle puidese corresponder".
O Rei Felipe VI decidiu renunciar á herdanza de Don Juan Carlos "que persoalmente lle puidese corresponder", anunciou este domingo a Casa do Rei, nun comunicado no que tamén avanza que Don Juan Carlos deixa de percibir a asignación que ten fixada nos Orzamentos da Casa de S.M. o Rei.
En menos de seis anos de reinado, Felipe VI afronta unha segunda crise relacionada coas actividades dun familiar. Primeiro foi o Caso Nóos. Agora son os negocios de Don Juan Carlos e os posibles fondos en paraísos fiscais. Felipe VI rompe vínculos co seu pai: di descoñecer como obrou o seu pai, desvincúlase dos fondos abertos, renuncia á herdanza do seu proxenitor e retíralle a asignación salarial coa que contaba ata o de agora. A forma de proceder en ambos os casos foi a mesma: romper vínculos. Un intento de devasa para evitar os posibles danos á institución que comanda.
Esta fin de semana, o diario británico The Telegraph informaba de que Felipe VI aparecía como segundo beneficiario da fundación offshore -Fundación Lucum- que aparece como titular da conta bancaria que recibiu a presunta doazón de 65 millóns de euros de Arabia Saudita ao seu pai, o rei emérito Juan Carlos I.
Escribe o teu comentario