Emocionante homenaxe á asasinada Cristina Cabo con miles de persoas aplaudindo nas rúas de Lugo (vídeo)

A convocatoria da Plataforma Feminista de Lugo foi un éxito rotundo. Varios miles de lucenses encheron a Praza Mario da cidade para render homenaxe á súa veciña, que era tamén activista feminista. 

Hai outra concentración de repulsa convocada pola comunidade colombiana este fin de semana. O asasino confeso, José Valencia Silva, é inmigrante colombiano. Vox Lugo relacionou inmediatamente o crime coa inmigración e pediu a expulsión inmediata de todos os inmigrantes sen papeis. 

O delito non está a ser tratado por agora como un caso de violencia de xénero. Cabo e Valencia coñecéronse esa mesma noite nun local de lecer nocturno e, ademais, a Policía atopou na casa del aparellos presuntamente roubados do domicilio da comerciante.

Ademais de Lugo cidade, houbo concentracións noutros lugares da provincia e tamén nalgunhas cidades galegas como Vigo.

Convocadas pola Plataforma Feminista de Lugo, un milleiro de persoas concentráronse ás 20,00 horas na Praza Maior da cidade luguesa para manifestar o seu pesar pola morte da muller de 42 anos, que era moi coñecida en Lugo, onde rexentaba un negocio.

A manifestación, na que participaron representantes políticos de todas as forzas da cidade coa alcaldesa, Lara Méndez, á cabeza, encheu boa parte da praza onde se sitúa a sede do consistorio local, chegando mesmo a penetrar pola rúa da Raíña.

Os asistentes, que corearon proclamas como 'autodefensa feminista', gardaron un minuto de silencio en memoria de Cristina Cabo, á que, nun texto lido durante a concentración, lembraron pola súa implicación na vida da cidade e en causas sociais. Despois a Praza Maior estalou nun longo e prolongado aplauso:

A ALCALDESA MÉNDEZ: "O FOCO, SON Os QUE ASASINAN"
"O foco, non o esquezamos nunca, son os que nos asasinan", incidiu a rexedora luguesa, Lara Méndez, en declaracións aos medios difundidas tras a concentración, nas que instou a permanecer "firmes" como sociedade e "non dar un paso atrás na loita contra a violencia machista" 

"As mulleres somos libres e debemos poder exercer a nosa liberdade sen medo. E, para iso, debemos ser contundentes e actuar contra todo tipo de violencias machistas desde todos os ámbitos, desde a educación e a concienciación social, coa lexislación ne a man e coas forzas de seguridade", incidiu Méndez, que trasladou a súa pesar e o de toda a institución á familia e achegados de Cristina Cabo.