Pablo Iglesias reivindica na Coruña o papel de Podemos no Goberno e pon ao PP no centro do caso Villarejo

O secretario xeral de Podemos e vicepresidente segundo do Goberno, Pablo Iglesias, reivindicou a xestión dos representantes no Executivo central de Unidas Podemos, aínda que instou a non esquecer para quen "goberna".

Fíxoo no acto de proclamación do secretario xeral de Podemos en Galicia, Antón Gómez-Reino, como candidato á Presidencia da Xunta pola coalición Galicia en Común-Anova Mareas, nun acto na Coruña que contou coa presenza tamén da ministra de Traballo, Yolanda Díaz.

Nel, defendeu que Unidas Podemos está no Goberno central "a pesar das cloacas", dixo arremetendo contra os que deron voz "aos sicarios" e tamén contra os "poderes oligárquicos". "Supostamente era o goberno do PP o que daba ordes a esa trama mafiosa como Villarejo para evitar que Podemos puidese estar no Goberno de España", remarcou a este respecto.

Fronte a eles, reivindicou a xestión feita "en mes e medio" e subliñou medidas como a subida do salario mínimo interprofesional ou outras en marcha como a futura lei de protección á infancia que se impulsará desde a súa carteira ministerial.

"Gobernamos mellor, é unha cousa que ata recoñecen os nosos adversarios", defendeu Pablo Iglesias nun acto no Palacio de Congresos e Exposicións da Coruña (Palexco) ante unhas mil persoas.

En similares termos, pronunciouse a ministra de Traballo, Yolanda Díaz, quen insistiu na súa intención de traballar para "derrogar a reforma laboral do PP". Tamén defendeu medidas como novos impostos vinculados coas empresas tecnolóxicas en aras da "xustiza social".

"Sobre o traballo indecente e precario non se crea nada", dixo, en particular, sobre a reforma laboral, nunha intervención no que, en referencia en concreto a Vox, pero tamén ao PP, apelou á posta en marcha de "leis xustas e recursos para que deixen de asasinarnos", engadiu lembrando ás vítimas de violencia de xénero.