​A Xunta apoia a proposta dun Benelux ibérico e ábrese a ter "unha política aeroportuaria conxunta"

O alcalde do Porto, Rui Moreira, propuxo nas últimas horas unha alianza entre España e Portugal, similar ao Benelux. A proposta tivo unha gran acollida no seo do Goberno de Galicia e o presidente da Xunta, Alberto Núñez Feijóo, cuestionado respecto diso por Galiciapress, mostrou publicamente o seu beneplácito a esta proposta á que catalogou de “nova e un pouco provocativa, en sentido positivo”.

Ademais, Feijóo mostrouse aberto a tender máis pontes de cooperación entre os gobernos galego e portugués. “Xa me gustaría ter unha política aeroportuaria conxunta”, afirmou o líder do PPdeG.

Feijóo xunto ao alcalde do Porto Rui Morerira

O Benelux podería ter un irmán xemelgo no futuro no sur de Europa. A península ibérica podería acoller un sistema similar ao formado por Bélxica, Holanda e Luxemburgo con España e Portugal como estados protagonistas, tal e como vén de propoñer Rui Moreira, alcalde do Porto, que avoga pola construción dunha “identidade ibérica” por medio deste proxecto común, que proxecta máis aló das fronteiras do Vello Continente, xa que na súa proposta está tamén incluír a Iberoamerica. "Sempre crin, desde que Portugal e España teñen democracias, que deberiamos ter un Iberolux", declarou o gobernante portuense.

Esta proposta atopouse co respaldo inmediato do Goberno de Galicia e Alberto Núñez Feijóo, presidente da Xunta, recibiu cos brazos abertos esta idea, á que tachou de “nova e un pouco provocativa en sentido positivo”. “Necesitamos na península ibérica vivir como dous estados e nacións da Unión Europea importantes sumados pero menos importantes se non traballamos conxuntos no concepto da Unión”, afirmou o presidente galego.

RÉPLICA AO BREXIT

Para o mandatario galego, a oferta é “positiva”, especialmente despois da consecución do Brexit. “Unha vez o Reino Unido lamentablemente saíu da Unión quedan catro grandes países na UE: Francia, Alemaña, Italia e España”, advertiu Feijóo, que aproveitou para declarar que este é o momento para que España asuma un papel como actor principal dentro da política comunitaria. Nese sentido, o dirixente tendeu a man a Portugal para que sexa o conxunto da península a que asuma esa responsabilidade.

“Se España e Portugal traballan xuntos tanto na UE como noutro foros comunitarios loxicamente somos máis. Seriamos 58 ou 59 millóns de persoas”, replicó o mandatario autonómico.

“Detrás disto está o funcionamento da península ibérica como un territorio crave dentro da Unión Europea e o funcionamento máis local e concreto da Eurorrexion Galicia-Norte de Portugal”, aventurou Feijóo, que aproveitou para catalogar á cidade portuense como “unha das máis importantes da Eurorexion”. “Todo aquilo que sexa traballar de forma conxunta paréceme adecuado”, sostivo.

“UN POLÍTICO AMIGO”

Sobre o alcalde da cidade portuguesa o presidente galego só tivo boas palabras para Rui Moreira, ao que se referiu como “un político amigo” e unha persoa “con propostas sobre as que se debe reflexionar”. “Teño respecto polo alcalde do Porto, primeiro porque cambiou a cidade e mellorouna substancialmente, e segundo porque estou moi agradecido ao alcalde pola designación que me fixo hai un tempo como Cidadán de Honra do Porto”, comentou Feijóo. “Somos seis millóns de persoas na Eurorrexión e é positivo para o Norte de Portugal, para Galicia, para a República de Portugal e para España”, resolveu Feijóo.

O alcalde portuense e o dirixente galego mantén unha boa relación

MÁIS ACCIÓNS CONXUNTAS?

Nesa liña, o presidente autonómico non escondeu que lle gustaría seguir estreitando os lazos que unen a Galicia con Portugal en moitas materias, como así se fixo na promoción conxunta do Xacobeo 2021. “Xa me gustaría ter unha política aeroportuaria conxunta”, subliñou o popular galego, deixando no aire a posibilidade de seguir tendo pontes no futuro entre a administración galega e o executivo luso, aínda que precisou que “lamentablemente” este punto a día de hoxe coas competencias autonómicas e a lexislación vixente “non era posible”.