Abre prazo o concurso de relatos da RAG e .gal , que lanza un desconto especial

As pezas a concurso non poden superar as 200 palabras. O dominio para a lingua e cultura galegas poderase rexistrar por só 15 euros para dous anos grazas a unha oferta especial.

Representantes da directiva de puntoGAL e a RAG

A Real Academia Galega (RAG) e a Asociación PuntoGal convocaron a terceira edición do certame de microrrelatos que crearon en 2018 co obxectivo de reforzar a presenza do galego e da identidade propias no mundo dixital.

O prazo de presentación dos textos, para persoas de todas as idades, abrirase o un de febreiro e concluirá a finais dese mes, segundo informaron, na presentación desta iniciativa, o presidente da RAG, Víctor F.Freixanes, xunto ao presidente de PuntoGal, Manuel González, e o seu director xeral, Darío Janeiro.

Na presentación, tanto Freixanes como Manuel González incidiron na necesidade de "integrar ás novas xeracións" no uso do galego e neste obxectivo situaron o concurso.

Por outra banda, destacaron o aumento no número de participantes, pasando de 300 na primeira edición a 480 na segunda, segundo expuxeron.

TRES CATEGORÍAS PARA TODAS AS IDADES
Nesta edición, repartiranse nove galardons, tres en cada unha das categorías distribuídas por idades para facilitar a participación de todo o público. En infantil, poderán participar nenos e nenas de ata 11 anos; en xuvenil, mozos de 12 a 17 e na de adultos, calquera persoa maior de idade.

Por outra banda, en neste mesmo acto, anunciouse unha nova promoción por parte de PuntoGal para rexistrar o dominio .gal durante dous anos por 15 euros máis IVE, a metade do prezo habitual.