Martín Fernández Prado relevo de Beatriz Mato no PP da Coruña

Fernández Prado tentará facer compatible o seu cargo no Parlamento de Galicia e a súa nova posición na política local, onde ten experiencia como subordinado de Negreira

O deputado autonómico do PP Martín Fernández Prado dirixirá a nova xestora do PP na cidade da Coruña, segundo informaron os populares coincidindo coa reunión que a dirección provincial celebra este luns e na que dará luz verde a esta decisión.

Ademais, Fernández Prado entrará tamén a formar parte como concelleiro no grupo municipal do Partido Popular no Concello da Coruña. Farao en substitución de Beatriz Mato, que anunciou a súa decisión de deixar os seus cargos, tanto á fronte do PP local coruñés como o de deputada autonómica e portavoz dos populares no consistorio coruñés.

Con experiencia na vida política local tras formar parte do goberno municipal liderado por Carlos Negreira entre os anos 2011 e 2015, Martín Fernández Prado asegura que afronta este novo reto consciente da "importante responsabilidade" que supón presidir a xestora do Partido Popular na cidade da Coruña.

Con "clara vocación integradora", o novo equipo de traballo que liderará Fernández Prado estará composto por todos os concelleiros do Partido Popular no concello herculino, co obxectivo de "axuntar esforzos e unir a todas esas persoas que están ao redor da nosa formación e que seguro que teñen moitas ideas e propostas que achegarnos", sinala.

Nesta mesma liña, o novo presidente da xestora popular insiste na importancia de "sumar e incorporar a xente que nos permita seguir facendo máis forte o partido" nun momento que cualifica de "clave" a nivel municipal.