"Faleceron galegos polos problemas da xestión do SERGAS", di un Cabaleiro que se ve listo para derrotar a Feijóo

Cualifica a Feijóo de "problema" para os galegos, entre os que "xera rexeitamento", e acusa ao PPdeG de "branquear a Vox" para buscar un aliado

Feijóo é un indolente, que carece de empatía, e isto vese en que aplicou a ortodoxia dos recortes que acabou, desgraciadamente, coa morte dalgúns enfermos. Este é un dos razoamentos do líder do PSdeG nesta entrevista na que mostra as súas calves para que a esquerda recupere a Xunta.

O líder dos socialistas galegos e candidato á Xunta, Gonzalo Caballero (Ponteareas, 1975), asegura que o PSdeG está "en condicións" de ser a "primeira forza" política nas próximas eleccións autonómicas. "É o mellor que lle pasaría a este país", exclama á vez que chama ao resto de forzas progresistas a facer "o mellor que poidan" para "recuperar o seu electorado".

Nunha entrevista concedida a Europa Press no arranque do ano no que se celebrarán os comicios galegos, que tocarían no outono de non producirse un adianto, o político vigués defende que o seu partido ten "os deberes feitos" e que sairá a por o "medio millón de galegos" que lle votaron en 2019. "Se acoden ás urnas cando haxa autonómicas o PSdeG será primeira forza e abriremos un proxecto de progreso para construír unha Galicia mellor na década dos anos 20", sinala.

O CAMIÑO XA ANDADO

Gonzalo Caballero, que lembra que o PSdeG foi "terceira forza" nas autonómicas de 2016, considera que a súa formación conseguiu saír dunha "situación moi complexa" para asentarse en 2019 como "o gran partido para construír o cambio en Galicia". "Pasamos de seis deputados a dez en España, conseguimos gobernar en cinco das sete cidades galegas, en tres das catro deputacións, en máis de 100 concellos, temos máis de 1.000 concelleiros", subliña.

"Somos un partido de esquerdas no que a cidadanía galega pode confiar. Somos a esquerda que sabe gobernar", defende o xefe de filas dos socialistas galegos, que se mostra convencido de que "a maioría social progresista que se manifestou en todas as eleccións en 2019 vai retirar a Feijóo da Xunta".

APELA AO TRABALLO DAS FORZAS DE ESQUERDA

Na entrevista concedida a Europa Press, considerou que todas as forzas da oposición en Galicia coinciden en que "hai que abrir unha nova etapa". "Estamos a plasmalo na actividade parlamentaria de forma continua e cremos que vai haber unha maioría social progresista liderada polo PSdeG", incide.

Deste xeito, cualifica ao resto de partidos da esquerda como "aliados" nun momento no que, na súa opinión, "as dereitas entregáronse á ultradereita". "O bloque de esquerdas ten que traballar conxuntamente para frear o risco de involución e de retrocesos en liberdades e en cuestións de igualdade que implica ese xiro", subliña.

"Por tanto, desde a nosa perspectiva, esperamos que as forzas de esquerda fagan cada unha o mellor que poida para recuperar o seu electorado e o seu espazo electoral", asegura o líder dos socialistas galegos, que avanza que a súa formación traballará "cun carácter construtivo e en positivo" para "atraer aos progresistas cara a un partido que quere construír unha maioría social ampla".

Con todo, avisa que o PSdeG tamén pedirá o voto a "todos os galegos que nalgún momento votaron a Feijóo pero que saben que o seu proxecto fracasou, está esgotado e que non ten folla de roteiro para o futuro".

LISTO PARA OS COMICIOS

Neste punto, considera que o presidente da Xunta "non sabe cando vai convocar as eleccións". "Neste momento sabe que, convóqueas cando as convoque, a maioría de Galicia quéreo retirar e non lle vai a dar a súa confianza". "Correspóndelle a el marcar o horizonte electoral e nós traballamos con todas as posibilidades, con que haxa eleccións esta primavera, no verán ou con que as haxa en setembro", apunta nunha entrevista na que a que pide ao PP que "faga unha campaña limpa".

Precisamente, o xefe de filas dos socialistas galegos acusa ao PPdeG de tentar "branquear" a Vox para asegurarse un aliado político tras as próximas eleccións nas que, ao seu xuízo, non manterán a maioría. "O PP branqueou a Vox en toda España e tamén en Galicia. O PP decidiu entrar nas institucións gobernando con Vox alí onde lle daban os votos e Feijóo é un cómplice desa situación", argumenta Caballero, que se mostra convencido de que o popular pactaría con esta formación para reter a Xunta.

FEIJÓO, "XERA REXEITAMENTO"
E é que Gonzalo Caballero ve ao máximo mandatario autonómico "desesperado" e considera que supón "un problema para galegos". "Hai nas cidades, no medio rural, na xente nova, nas mulleres, en moitos profesionais do país un hartazgo de Feijóo, xera rexeitamento porque foi un dirixente político indolente sen ningún tipo de empatía co seu pobo, coa súa cidadanía, co seu país", sostén.

Nunha entrevista na que reivindicou a necesidade dunha nova política económica, social e de vertebración do territorio, o socialista censurou que "en 11 anos" á fronte da Xunta Feijóo fose "incapaz de conectar co escenario urbano" e convertésese en "inimigo das cidades" e que "abandonase o rural".

OS PROBLEMAS DO SERGAS

Tras iso criticou "especialmente" a xestión sanitaria do Goberno galego. Así, acusou ao líder do PPdeG de "facer unha política sanitaria de recortes, de privatización, de precarización", unhas "políticas sanitarias que foron un desastre para Galicia". "Foi un indolente", insiste Caballero, que asegura que se lle deu a oportunidade de "rectificar" pero que o presidente preferiu "manterse nesa ortodoxia do dogmatismo conservador dos recortes".

"Faleceron cidadáns polos problemas da xestión sanitaria da saúde pública en Galicia", lamenta o líder do PSdeG, que considera que se un caso ejemplifica o "fracaso das políticas sanitarias de Feijóo" é o peche do hospital de Verín, conflito que "superou as fronteiras galegas".

CONTRATACIÓN DE PEDIATRAS

"Alí onde un paritorio funcionaba con capacidade, con solvencia e con seguridade durante anos, Feijóo decide eliminar ese servizo sanitario e decide facelo nunha política de recortes baseada en criterios políticos e non en criterios técnicos", cuestiona o socialista, que critica que o popular "alegue agora que non é capaz de contratar a dous profesionais sanitarios".

"Mostra a súa indolencia e incompetencia", manifesta Gonzalo Caballero, que subliña que gobernante "ten que dar solucións porque ten orzamentos, capacidades". "Se un presidente da Xunta ten que solucionar un problema ten todos os instrumentos para poder buscar como contratar a dous médicos cun orzamento de 11 millóns de euros", asegura o socialista, que cre que alguén que "non é capaz de ter esa iniciativa é alguén que non está á altura dos problemas dos galegos".

CRISE INDUSTRIAL

Por último, preguntado pola crise industrial que atravesa Galicia, defendeu os "avances" conseguidos polo Goberno para a central das Pontes ante o fin da produción con carbón fronte a un Rajoy que "non fixo nada para transitar cara a novos modelos".

"Chegamos ao goberno e posibilitamos que a central puidese ter actividade durante anos", asegura Caballero, que tamén subliñou os esforzos dos socialistas para "conseguir ter actividade na planta de Alcoa en San Cibrao".

"Imos tentar facelo con todo o esforzo, poñendo a funcionar un estatuto das electrointensivas", indicou tras lembrar que en 2019 "o goberno de España deulle ao redor de 38.000 euros por traballador" en axudas a esta empresa. "Temos que ter a Alcoa en observación, con toda a presión política, pero é certo que o Goberno de España está a traballar coa prioridade de manter o emprego no sector industrial", apunta.