Folga de profesores este xoves para recuperar as horas que impartían antes da crise

Unidade entre os sindicatos de mestres, que destaca que imparten moitas máis horas lectivas que a media europea. Na súa opinión, está en xogo a calidade do servizo público.

Os profesores galegos de ensinos non universitarios están convocados a a folga este xoves. A campaña de mobilizacións emprendida polos sindicatos docentes desembocará nunha xornada de protestas, na que estas organizacións marcharán de forma unitaria nunha manifestación polas rúas de Santiago de Compostela para reclamar a Xunta a redución do horario lectivo e o regreso á xornada previa aos recortes do sistema educativo.

#18e21horas é un dos slogan dos convocantes, aquí encerrados en San Caetano

UNANIMIDADE DOS PRINCIPAIS SINDICATOS
As mobilizacións están convocadas polos sindicatos da mesa sectorial de Educación (CIG-Ensino, CC.OO. Ensino, FeSP-UXT e ANPE), STEG e CSIF, co obxectivo de esixir ao Goberno galego que de marcha atrás aos recortes emprendido polo Goberno de Alberto Núñez Feijóo a partir de 2011. Particularmente, reclaman que se anule a ampliación do horario lectivo dos docentes, que supuxo o paso de 21 a 25 horas en primaria e de 18 a 20 en secundaria.

Gráfica de horario lectivo dos profesores galegos difundida polos convocantes

Os sindicatos acusaron á Consellería de Educación de negarse a negociar a devolución desta medida, a pesar de que outras comunidades autónomas do Estado están a recuperar este dereito perdido dos docentes durante a crise económica, cando o Goberno central decidiu impoñer este horario no territorio de forma similar ao que fixo a Xunta un ano antes.

Así, as organizacións acordaron un calendario de medidas de presión e reivindicativas que culminarán o xoves con a folga nos centros educativos e cunha marcha que sairá da Praza de Cervantes de Santiago ás 12,00 horas.

MIL PROFESORES MENOS
A comitiva percorrerá a Algalia de Arriba e San Roque ata chegar ás dependencias da Consellería en San Caetano, onde diversos representantes dos sindicatos docentes lerán un manifesto para reclamar a reversión dos recortes.

En concreto, denuncian o empeoramento das condicións de traballo dos docentes tras as medidas dos Gobernos do PP ademais da "desatención" aos alumnos con necesidades especiais, en paralelo aos recortes orzamentarios e a perda de máis de mil postos de profesorado nos corpos de secundaria, entre outras.

A protesta conta co apoio de organizacións do alumnado galego e algunha delas unirase á marcha cunha manifestación propia, ademais dos grupos políticos que conforman a oposición ao Partido Popular.