Primeiras fotos e vídeos do submarino con droga interceptado en Galicia

O 'narcosubmarino' afundido na Ría de Aldán segue baixo o mar, a pesar de que as autoridades pasaron todo este luns traballando no seu reflotamento.

Segundo fontes próximas á operación, o seu rescate é complicado xa que ao deixar a escotilla aberta os narcos lograron que se enchese de auga. Agora ben, a zona ten pouca profundidade, polo que a nave é perfectamente visible cando a marea está baixa, como proba este vídeo facilitado polo SUP a Galiciapress:

As mesmas fontes apuntan que xa está confirmado que hai droga dentro. Aínda que os submarinistas da Garda Civil só lograron sacar por agora un fardo pola pequena escotilla, especúlase coa posibilidade de que a nave transporte uns 3.000 quilos de cocaína.

Proa do submarino con droga durante a baixamar do domingo | SUP

Por agora descoñécense moitos detalles deste sorprendente achado. É a primeira vez que se localiza en España un 'narcosubmarino' destas dimensións. O outro aprehendido hai uns anos na Ría de Vigo era utilizado para pequenas viaxes desde a costa galega a embarcacións próximas ao litoral. Pola contra, o submarino de Aldán é moito máis avanzado, capaz en teoría de cruzar o Atlántico.

As autoridades prevían dar máis detalles da operación o luns desde Madrid, xa que se trata dun dispositivo internacional. Con todo, a comparecencia atrasouse, debido a que o submarino segue afundido.

Ademais, os axentes continúan buscando ao narcotraficante fuxido e que chegou a nado ata a costa. Hoxe rexistraron varias casas na zona de Cangas, onde houbo numerosos controis de estrada tamén. Os seus dous compañeiros de travesía ecuatorianos continúan detidos.