Alcampo di que busca 110 traballadores en Galicia para o emprego de Nadal

A multinacional dos hipermercados indica que os candidatos poden mandar os seus currículos a través de Internet

Auchan Retail España prevé incorporar a partir de principios de outubro a 1.185 persoas para reforzar postos de reposición, venda e caixas durante a campaña de Nadal nos seus hipermercados e supermercados Alcampo, segundo informou a compañía. Ata 110 destes postos cubriranse en Galicia.

Por comunidades autónomas, os centros de Madrid prevén contratar a 300 persoas e os de Andalucía 150, número que ascende a 125 en Cataluña e a 110 tanto en Aragón como en Galicia.

Na Comunitat Valenciana, pola súa banda, cubriranse 80 vacantes, 60 no País Vasco, e ao redor de 40 en Tenerife e Castela-A Mancha.

Así mesmo, en Castela e León contratarase a 35 persoas (maioritariamente en Burgos) e en Asturias, A Rioxa, Baleares e As Palmas o número de persoas contratadas ascenderá a 30 en cada comunidade autónoma. Ademais, en Murcia (onde só hai un hipermercado Alcampo) e Navarra, os postos para cubrir elévanse a 10.

Os candidatos poderán acceder a través do apartado destinado ao emprego das páxinas web www.auchan-retail.es e www.simply.es.

Auchan Retail España reúne os formatos de hipermercados, supermercados e proximidade. Na actualidade conta con 369 centros (62 hipermercados e 307 supermercados), así como 53 gasolineiras, servizo de comercio 'online' e un persoal de 20.800 persoas.