O BNG dá apoio a 'Enfermeiras sen cadeas' e alerta que Vigo é o banco de probas da privatización do SERGAS

Os nacionalistas denuncian o uso da área de Vigo como "banco de probas" de recortes e privatización 

O BNG reclamou este luns un cambio "radical" na política sanitaria da Xunta, e denunciou a utilización da área de Vigo como "banco de probas" de recortes e privatizacións, á vez que trasladou o seu apoio ao colectivo de 'Enfermeiras sen cadeas', co que mantiveron unha reunión tanto a deputada nacionalista Montse Prado, como o concelleiro no Concello olívico, Xabier Pérez Igrexas.

Reunión entre o Bloque e as enfermeiras

Así, no encontro, Pérez Igrexas e Montse Prado escoitaron as queixas e demandas destas profesionais, e denunciaron que as súas condicións están marcadas pola eventualidade, a ausencia de conciliación familiar, ou a extensión das xornadas, "e que agravará o chamado contrato de continuidade".

CRÍTICAS A CORINA PORRO
O concelleiro do BNG subliñou que a Xunta utilizou Vigo como "banco de probas do seu proxecto de desmantelar a sanidade pública", e criticou os "paseos" dos conselleiros pola cidade, que só pretenden "recuperar ton electoral".

Así mesmo, estendeu as críticas á delegada territorial do goberno galego, Corina Porro, á que instou a, en lugar de poñerse de maneira "demagóxica" a camiseta do Celta, poñerse "a camiseta en defensa da sanidade pública".

"DESEÑO POLÍTICO"
Pola súa banda, a deputada Montse Prado advertiu de que a actuación do Executivo autonómico "non é unha praga bíblica", senón que responde "a un deseño político de precarizar a sanidade pública para beneficiar o negocio da privada".

A parlamentaria nacionalista ha anunciado a presentación de varias propostas na Cámara galega, na que o seu grupo reclama "o rescate público da área sanitaria de Vigo", poñer fin "aos recortes de persoal" e á "precariedade" do persoal.

Finalmente, Prado advertiu de que, neste escenario, está en xogo "a calidade" da asistencia, que non se pode garantir sen unhas condicións laborais "xustas e dignas" para os traballadores sanitarios.