​Policía Nacional fora de servizo salva a un home de morrer afogado en Ferrol+

O axente, que se atopaba gozando das súas vacacións en Ferrol, viu como unha persoa estaba a ser arrastrada pola corrente e as ondas e lanzouse ao mar para salvalo.

Praia de Domiños

Se o perigo non descansa nin en vacacións, os heroes tampouco. Iso é o que debeu de pensar o axente José Luís Grandal Teijeiro, que non dubidou nin un momento en deixar de lado as súas vacacións e lanzarse ao mar para socorrer a unha persoa á que estaba a arrastrar a corrente e a ondada na praia de Doniños, en Ferrol.

O axente, que se atopaba fóra de servizo, presenciou desde o paseo como un individuo tiña dificultades para saír do mar e non titubeó á hora de subirse a unha táboa de surf e nadar ata o afectado para socorrelo.

"Axúdame, que xa non podo máis" foi o que lle dixo o home que se atopaba no mar pelexando por salvar a súa vida no momento no que Grandal chegou ata el e puido poñelo sobre a táboa. Cos dous subidos na táboa e ante un mar moi picado, o axente decidiu remar en diagonal e axudarse das propias ondas para tentar alcanzar a beira.

Despois de "bastante tempo" e "con moitas dificultades", como manifesta o parte presentado ante a comisaría da Policía Nacional de Ferrol, logran achegarse á beira e ser auxiliados por unha socorrista, Fátima Sánchez Palacios, que se atopaba nese momento tamén en fóra de servizo, xa que o servizo de socorristas foi suprimido o pasado día 10. 

A propia socorrista recoñece que de non ser pola rápida intervención do axente o nadador, un home de mediana idade, afogouse case con total seguridade. Un acto valeroso que logrou salvar unha vida nas augas de Ferrol.