Un restaurante no Porto de 8 Estrelas Michelín e 20 Soles Repsol será "embaixador" da gastronomía galega
Un convenio de colaboración asinado este luns entre a Xunta e o Grupo Nove permitirá a apertura dun restaurante temporal no Porto (Portugal), de 8 Estrelas Michelín e 20 Soles Repsol, que fará de "embaixador" da "excelencia" da cociña galega.
Así o destacou o conselleiro de Cultura e Turismo, Román Rodríguez, durante a firma do acordo xunto ao presidente de Nove, o cociñeiro Miguel Ángel Campos, que tivo lugar na Cidade da Cultura, en Santiago. O acto contou coa presenza da directora de Turismo de Galicia, Nava Castro, e dos chefs Xosé Cannas, Yayo Daporta, Lucía Freitas, Juan Crujeiras, Roberto Filgueira, Javier Rodríguez 'Taky' e Álvaro Villasante.
En concreto, o establecemento será atendido por todos os chefs do Grupo Nove, que participarán do 24 de outubro ao 17 de novembro neste local efémero que se situará no Hotel Carrís Porto Ribeira con servizo de ceas de martes a domingo.
O conselleiro de Cultura e Turismo subliñou a "profesionalidade e o bo facer" destes cociñeiros e sinalou que está actuación "favorecerá a internacionalización" da oferta gastronómica galega "nun mercado de gran potencial" e contribuíndo así á "desestacionalización" da actividade turística.
O restaurante terá o obxectivo de "recrear a esencia de Nove", tal e como informa a Xunta, a través dun menú degustación elaborado polos 22 chefs do Grupo que buscará "exportar a alta cociña galega máis aló" da Comunidade.
Ademais, o acordo asinado inclúe o impulso dos 'Roteiros Nove', un paquete para turistas interesados en experiencias centradas na cociña galega. Haberá un total de tres paquetes que ofrecerán aloxamentos respectuosos co medio ambiente, produtos centrados no turismo de benestar e de balnearios, e establecementos de cinco estrella e en restaurantes con Estrelas Michelín, respectivamente.
Escribe o teu comentario