"Balón de osíxeno" para as comisarías galegas, aínda que sexa só para o verán
O secretario federal territorial do Sindicato Unificado de Policía (SUP) en Galicia, Roberto González, valorou a incorporación de novos axentes da Policía Nacional ás comisarías galegas, que ofrecerán "un balón de osíxeno" durante a época estival.
O próximo día 16 de xullo incorporaranse 150 axentes en prácticas dunha promoción de 3.200 persoas, e chegarán os trasladados a Galicia do concurso xeral de méritos, uns 111 policías, 11 subinspectores e 11 oficiais.
Roberto González sinalou que a situación do persoal da Policía Nacional nesta Comunidade autónoma presenta un 20% de déficit, o que ao seu xuízo "é bastante elevado", aínda que esperan que se continúe na liña de ir cubrindo prazas "nos próximos anos".
O SUP propón cubrir estas vacantes durante a tempada estival acudindo aos "servizos extraordinarios", para que os funcionarios libre de servizo poidan prestar eses labores de prevención e investigación nos días de maior afluencia de persoas.
No caso da Comisaría de Pontevedra chegarán o próximo mes de xullo 25 axentes en prácticas e incorpóranse 14 policías máis mediante o novo concurso xeral de méritos.
En Vigo incorporaranse 30 axentes en prácticas e 24 trasladados a través do citado concurso. En Marín son 5 de prácticas e 4 trasladados, e en Vilagarcía 6 en prácticas e 4 trasladados.
O Sindicato Unificado de Policía levaba tempo alertando "dun feito que non debe producirse na seguridade pública" como é a inexistencia dunha taxa de reposición estable das prazas vacantes.
MELLORA DAS OPOSICIÓNS
"Nós o que pedimos é que se convoquen as prazas dos axentes que se xubilan", lembrou Roberto González insistindo en que "a situación económica ou política non marque esas convocatorias" de prazas.
O SUP valora que desde hai dous anos as convocatorias están a ser "aceptables" e sinalou que a última Oferta de Emprego Público para a escala básica da Policía Nacional son 2.500 prazas.
Escribe o teu comentario