Movemento en Inditex: Carlos Crespo é o novo número 2

Inditex apúntase á tendencia de moitas grandes compañías de situar a dous executivos na parte alta da súa cúpula, evitando así erros dunha soa persoa. Pablo Isla, que segue ao temón, selecciona a un home da casa para ser segundo de a bordo do barco de Zara, Oshyo, Pull&Bear, Massimo Dutti, Bershka, Stradivarius e outras marcas.

Carlos Crespo 

O presidente de Inditex, Pablo Isla, propuxo a Carlos Crespo, actual director xeral de operacións da compañía, como conselleiro delegado da firma téxtil, segundo informou a insignia á Comisión Nacional do Mercado de Valores (CNMV).

En concreto, este nomeamento será efectivo tras a súa aprobación polo consello de administración, unha vez sexa designado conselleiro pola xunta xeral de accionistas, que se convocará en xullo, onde se procederá tamén á reelección de Pablo Isla como presidente executivo da firma.

Desta forma, o xigante téxtil recupera a figura do conselleiro delegado coa designación de Carlos Crespo. Ademais, de resultar aprobados estes nomeamentos, o consello de administración, que continuará liderado por Pablo Isla como presidente executivo, pasará a contar con dous conselleiros executivos, manterá en tres o número de conselleiros dominicais e seguirá contando cunha maioría de seis independentes.

NOVAS RESPONSABILIDADES DE CRESPO

Desde a súa nova posición como conselleiro delegado, e reportando ao presidente executivo, Crespo será responsable das áreas de tecnoloxía (sistemas, datos e dixital), seguridade da información, loxística e transporte, obras, asesoría xurídica, compras e contratacións, e sustentabilidade, e será o encargado de definir xunto con Isla a estratexia global da compañía.

Crespo agradeceu a confianza depositada nel para axudar a esta integración tecnolóxica. "Estou moi ilusionado de poder participar neste momento da compañía, onde tanto a transformación dixital como a sustentabilidade en todas as súas vertentes supoñen retos apaixonantes para cuxo desenvolvemento son imprescindibles innovación, espírituemprendedor e traballo en equipo, aspectos intrínsecos á cultura da nosa empresa", indicou.

TRAXECTORIA PROFESIONAL

Crespo iniciou a súa carreira en auditoría de contas e incorporouse a Inditex no 2001 como responsable de políticas contables dentro do departamento de administración financeira. Tras dirixir posteriormente a xestión administrativa de existencias nos centros loxísticos do Grupo, asumiu en 2005 a responsabilidade de dirixir a auditoría interna, ata que en 2018 foi designado director xeral do grupo, posición que ocupará ata o seu nomeamento como conselleiro delegado en xullo.

Inditex precisou que a traxectoria de Carlos Crespo dentro do grupo de moda e a súa responsabilidade á fronte da dirección xeral de operacións anticipaban de forma natural este nomeamento.

MOMENTO ESTRATÉXICO DE TRANSFORMACIÓN DIXITAL DA COMPAÑÍA

Isla anunciou o ano pasado que as tendas de Inditex serán plenamente dixitais, integradas con 'online' e sustentables en 2020. Nese momento, toda a tecnoloxía RFID, que actualmente está xa completamente despregada en Zara, Massimo Dutti e Uterqüe, terminarase de implantar no resto de tendas e marcas do Grupo, fito que coincidirá coa culminación do programa de implantación de tendas ecoeficientes, completado hoxe nun 86%.

O presidente de Inditex indicou que a firma é unha "gran empresa grazas ao compromiso e ao traballo de todas as persoas que formamos parte dela" e destacou o "gran labor" que Crespo veu realizando en distintas áreas da compañía, en particular como director xeneral de operacións, e subliñou que a súa achega será moi valiosa "no momento estratéxico actual de transformación digitaly de compromiso coa sustentabilidade da compañía".

Para conseguir este obxectivo, Inditex desenvolveu desde 2012 un plan de optimización de tendas que permitiu a adaptación tecnolóxica do 90% do parque de tendas cun total de 3.364 aperturas brutas, 3.383 reformas e ampliacións, e 1.400 absorcións de unidades máis pequenas no últimos seis anos.