Villarino: “Votar ao PSOE en Ourense ten un valor histórico, podemos cambiar o Concello, a Deputación e o goberno de caciques”

O baltarismo pode caer este domingo, prevé Rafael Rodríguez Villarino nesta entrevista con Galiciapress. O líder nas enquisas á alcaldía de Ourense á fronte do PSdeG chama aos ourensáns para demostrar que “isto é unha democracia e non un cacicada”. El preséntase co aval de doce anos como alcalde de Amoeiro e coa promesa de gobernar dialogando con todos. Un posible pacto con Democracia Ourensana, a proposta dun tranvía e o declive cultural da cidade son outros dos temas desta conversación.

Como valora a últimas enquisa, que sitúa ao PSOE como forza máis votada en Ourense, concedéndolle ás socialistas opcións de gobernar a cidade?

A cidadanía quere un cambio e quere que ese cambio está liderado polo PSOE, despois de catro anos de inacción absoluta do PP e de falta de alternativas no resto de formacións. Finalmente a xente decídese polo único partido que lles pode proporcionar unha alternativa viable, con ilusión e esperanza.

En todo caso, tendo en conta a historia electoral do concello e as referidas enquisas, é improbable que un hipotético goberno do PSdeG teña maioría absoluta. Para evitar o sucedido estes catro anos, que o PP gobernando en minoría non logrou aprobar nin un presupuesto;, no caso de que vostede gañe, cal será a primeira chamada que realice a noite electoral para tentar construír un pacto estable?

A situación dun Goberno local sen maioría absoluta non é única da cidade de Ourense. O realmente excepcional é que Ourense sexa con Granada a única cidade de toda España que non logrou aprobar uns orzamentos en catro anos. A estas alturas da democracia, o normal é chegar a acordos. Nós somos dialogantes e imos tentar conseguilo. Esperemos que o resto se sumen a este diálogo que nós lanzaremos. Chamaremos ao resto de partidos pola orde de votos que logren para ver a súa disposición.

Non imos a desconsiderar a ninguén, nin perderlle o respecto a ninguén, todo o contrario. Imos falar con todo o mundo. O nivel de acordo que cristalice non ten porque ser necesariamente un pacto estable  

E nesa rolda de contactos estará Democracia Ourensá. Dígoo porque durante esta lexislatura o PSOE desatendeu os numerosos chamamentos de Jácome para pactar e desaloxar ao PP da alcaldía. Agora, con Rodríguez Villarino como novo líder local, está o PSOE de Ourense disposto a abrirlle a porta a un goberno conxunto con Democracia Ourensá?

O PSOE vaise reunir con todos os partidos políticos sen excepción. Non somos un partido de vetos e bloqueos e non queremos ter paralizada a cidade. Do pasado eu non podo responder porque eu non estaba nesta corporación municipal. Veño sen mochilas e cun equipo renovado para presentar unha alternativa nova. Non imos a desconsiderar a ninguén, nin perderlle o respecto a ninguén, todo o contrario. Imos falar con todo o mundo. O nivel de acordo que cristalice non ten porque ser necesariamente un pacto estable, pode ser acordos puntuais. O máis importante son as coincidencias en liñas programáticas para sacar esta cidade do seu abandono actual. Non somos un partido sectario.

Villarino fotográfase así nos seus actos de campaña, aquí en Mariñamansa

Vostede lembra que chega agora ao Concello de Ourense, pero faino tras doce anos como alcalde do veciño Concello de Amoeiro. Que pode contribuír a súa experiencia como alcalde ao goberno da cidade?

Eu son psicólogo, dediqueime durante un tempo á selección de persoal, era o primeiro que faciamos cando tentabamos levar adiante un proxecto, seleccionar ás persoas que puidesen materializalo. O primeiro que faciamos era un control de referencias. Eu pídolle a todo o mundo que faga un control de referencias da miña traxectoria no Concello no que estiven durante 12 anos. Iso servirá de aval para ver se podo achegar algo ou non ao Concello de Ourense. Desde logo, durante eses 12 anos, os primeiros anos por certo cogobernando co BNG, tivemos 12 orzamentos e desenvolvemos un modelo de concello que saíu do anonimato e pasou a ter identidade propia. De estar desatendido e sen ningunha visibilidade, a ser un concello destacado polas súas apostas en desenvolvemento social, innovación, memoria histórica, etcétera. Esta bagaxe tentareino aplicar para gobernar dunha maneira diferente, con diálogo, esta cidade.

Explique as súas propostas, por exemplo, en materia cultural. Vostede criticou que Ourense perdeu moito peso neste sector …

É evidente, desaparecendo o festival de cinema, desaparecendo o Outono Fotográfico, desmantelando a banda de música … Do mesmo xeito que outros ámbitos, o que fixeron é simplemente privatizar e quitarlle personalidade a este concello. O próximo ano celébrase o centenario da revista Nós. Desafortunadamente non estamos naquel nivel de puxanza literaria, pero si hai moitísimas figuras que debemos visibilizar. Somos o único partido que xa o fixo, cun acto no Teatro Principal. Está claro que a candidatura de Ourense como cidade patrimonio da UNESCO é unha alternativa que nós barallamos e máis aló, no horizonte, tentar que sexa Cidadae  Europea da Cultura para 2031 cun proxecto a longo prazo. Imos potenciar estes valores para que Ourense teña a súa banda e avance no seu recoñecemento pola UNESCO.

O seu programa inclúe unha proposta moi novedosa, un tranvía, que é un medio de transporte público que non funciona en case ningunha cidade galega. Que propoñen en concreto para o tranvía e en xeral para mellorar a mobilidade urbana?

A mobilidade é un dos aspectos mellor cubertos na cidade desde hai uns meses. Un equipo de arquitectos moi cualificado levou a cabo un programa de mobilidade urbana, Móvete por Ourense, que ten que ver coa peatonilización de moitas rúas, a redución da velocidade noutras, a construción de aparcamentos, etcétera. Un proxecto que contou co apoio de todos os grupos políticos e que se realizou con, entre outras cousas, miles de enquisas. Sucede que o goberno local meteuno nun caixón. A parte de deseño de mobilidade está resolta.

E a proposta do tranvía?

Ten un ámbito de aplicación moi concreto. É unha proposta do PSOE desde 2011. A entrada do tren en Ourense polo camiño actual vai desaparecer porque se está licitando a variante norte. Ese corredor absolutamente chairo que comunica o centro da cidade co polígono de San Cibrao, onde traballa moita xente, é o lugar perfecto para, unha vez desmantelada a vía, sitúese ese tranvía, que vai mover a un gran número de poboación ata os seus postos de traballo. É algo práctico, directo e sinxelo. Ademais vaise acompañar con carril bici e zonas verdes e, ademais, vai comunicar dúas beiras da cidade separadas ata agora polo tren, cambiando por completo a aparencia da cidade.

Atrévese a facer un prognóstico para as eleccións deste domingo? Tendo en conta o malísimo resultado do PP na cidade na xeral, onde perdeu un terzo dos seus votos; e o gran resultado do PSOE, por encima do 36% dos sufraxios … Son vostedes os favoritos?

Obtivemos o 36,43% dos votos, fomos a cidade onde o PSOE sacou mellor resultado de toda España, con Vigo, que nos igualou e con Soria, que andou tamén neste porcentaxe pero é unha cidade máis pequena. Esta onda de optimismo que transmitiu o goberno socialista nótase no día a día. As enquisas vaticinan a nosa vitoria. Segundo achégase o día, faise máis palpable.

Todo o mundo sae coa mesma sensación cando lle pide algo á Deputación, que é que lle fixeron un favor  

Entón, cantos concelleiros sacarán?

Un número concreto non me atrevo a dicilo, podería parecer presuntuoso. Temos que ser cautos e lograr unha cousa, que toda a xente salga a votar, necesitamos o seu apoio. O PSOE ten poder cando a xente participa. Cando o índice de participación diminúe a relevancia do PSOE tamén diminúe. Ademais, este voto ten un valor histórico, con el non só é posible cambiar o Concello senón tamén a Deputación.

Realmente cren que hai posibilidades reais por primeira vez de desaloxar ao baltarismo da Deputación de Ourense? Ten a sensación de que esta vez é posible?

E tanto, por primeira vez en 31 anos. Se replicáramos os resultados das eleccións xerais, xa estaría feito. Queremos que a xente manteña esa ilusión, ese pulso, algo que desexa todo o mundo na provincia, incluso os que lle temen; conseguir cambiar a Deputación e que a democracia entre nesta provincia. Ata agora non pasou, foi un goberno clientelar en mans de caciques. Un goberno que todo o mundo sabe que é clientelar porque todo o mundo sae coa mesma sensación cando lle pide algo á Deputación, que é que lle fixeron un favor. Nós queremos que a xente senta que ten dereitos e que recibe o que lle corresponde, sen deberlle nada a ninguén porque, á fin e ao cabo, isto é unha democracia e non unha cacicada.