O censo dun concello inclúe 30 mortos e empedronamientos en casas abandonadas, denuncia a oposición

A maioría das empresas -e dos empregos- do concello de Dozón están vinculados historicamente á familia Campos

A Unión de Cidadáns Independentes de Dozón (UCIN) denunciou no xulgado de Lalín a existencia de medio centenar de "empadroamentos irregulares" que vincula ao candidato do Partido Popular, Adolfo Campos.

Adolfo Campos, histórico alcalde de Dozón

Segundo informou a UCIN, durante a súa visita a diferentes núcleos do municipio para repartir propaganda electoral, os integrantes da candidatura observaron "diversas vivendas en estado de semiabandono" ou con "claros sinais de estar deshabitadas" nas que, "segundo o censo, residían persoas vinculadas á candidatura do PP e ás empresas" do candidato popular.

Así mesmo, explicou que, durante estas reparticións, constataron "a presenza no censo electoral de máis dunha trintena de persoas falecidas" e alertou tamén de "crecementos anormais" no censo en meses previos a esta e outras convocatorias electorais municipais.

DENUNCIA XUDICIAL

Precisamente, fontes da candidatura consultadas por Europa Press explicaron que trasladaron este asunto á Xunta Electoral de Pontevedra, órgano que lles trasladou que "non lle corresponde" investigar os feitos que poidan ser "constitutivos de delito" que deben ser denunciados perante o xulgado, a fiscalía ou a autoridade policial. Por iso, a Unión de Cidadáns Independentes de Dozón levou este asunto este mesmo xoves ao xulgado de Lalín.

A UCIN lembrou que a existencia desta rede é unha "protesta habitual" que realizaron en comicios previos diversos grupos políticos da oposición deste municipio pontevedrés. Con todo, asegura que "as prácticas pouco transparentes do goberno municipal e a política do medo instaurada polo alcalde obstaculizaron e impediron a comprobación da maioría destes casos".