O Caudal Fest de Lugo pon á venda as súas entradas o día 21 e confirma a Carolina Durante, Marea, Xoel López, Beret e Holywater

Tras o éxito da primeira edición o ano pasado, o festival que terá lugar os días 20 e 21 de setembro en Lugo, desvela os primeiros nomes do cartel

As entradas sairán á venda o martes 21 de maio cunha oferta de lanzamento limitada de 1.000 entradas a 29 euros. O ano pasado, na súa estrea, este festival recibiu a máis de 22.000 asistentes, segundo os datos da organización, que presentou o cartel este mércores.

Como novidade, en 2019 serán dous días completos de festival, o que ampliará a oferta musical para todos os asistentes. Terá como cabezas de cartel aos madrileños Izal e aos navarros Marea, que regresan tras máis de seis anos sen actividade cun novo disco e unha xira que os levará por gran parte de España. Ambos darán actuacións de longa duración.

HOLYWATER XOGARÁN EN CASA
Un dos estandartes da música galega, Xoel López, e tamén un dos regresos "máis esperados da música lucense", Holywater, tamén estarán no segundo Caudal Fest.

Haberá lugar para a música máis actual coa actuación do exitoso Beret e con un dos grupos revelación de 2018, Carolina Durante. A "festa", segundo resalta a organización, chegará da man do Adhesivo mentres que a achega máis urbana virá do rapero ToteKing. 

Holywater

Los Bengala, Agoraphobia, Bocanada,e Galician Army serán outras das actuacións que formarán parte da programación do Caudal Fest 2019, de modo que a programación mesturará o indie, o rock, o pop, o rap e a electrónica.

As entradas do festival estarán á venda o vindeiro martes 21 de maio ás 11,00 horas. Ademais, a zona de descanso para acampar á beira do festival tamén estará dispoñible ese mesmo día para reservar.

O Caudal Fest reivindícase ao "poñer a Lugo no mapa dos festivais nacionais cun dos carteis máis atractivos do norte de España" e tamén como "unha das últimas oportunidades para despedirse do verán, na mellor contorna posible como é o de Lugo e o do río Miño ao seu paso pola cidade".