O alumnado da USC, comprometido cos conflitos ambientais do país

A Facultade de Ciencias da Educción acolle este martes 7 de maio a primeira edición destas xornadas.

A conservación e defensa do medioambiente é un dos principais retos aos que se enfronta a sociedade actual, aínda que desgraciadamente non se están dando pasos para logralo. Por iso, o alumnado de Educación Ambiental e Cultura da Sustentabilidade, do grao de Educación Social e Pedagoxía da USC deu un paso á fronte e tomou a iniciativa de organizar a primeira edición das ‘Xornadas sobre conflitos ambientais en Galicia’, onde tratarán algúns dos conflitos ecolóxicos máis importantes da comunidade autónoma.

A xornada terá lugar o vindeiro martes 7 de maio a partir das 16 horas na Facultade de Ciencias da Educación, no Salón de Acto do módulo C.

O evento contará coa presenza de representantes de diversas plataformas que expoñerán a súa loita contra os conflitos ambientais que azoutan varias localidades galegas. Así, integrantes de plataformas contra vertedoiro de Casalonga, como a plataforma ‘Salvemos Catasós’, ou contra o proxecto mineiro de Touro, como a ‘Plataforma Veciñal Mina de Touro-O Pino NON’, así como a ‘Plataforma Auga Limpa Xa’, expoñerán algunhas das problemáticas ambientais máis controvertidas do país.

A xornada concluirá coa proxección do documental ‘Redes contra a política do espolio. Aire, auga e terras limpas’, do director Xosé Antón Bocixa Rei, que estará presente no acto para un posterior coloquio cos asistentes.