Despedida de 'Galicreques' na súa 30 edición coa estrea de 'Ephimeros' e o 'Premio Galicreques 2025'

O 'Festival Galicreques', organizado pola Asociación Barriga Verde co apoio e patrocinio de institucións como a Xunta, o Concello de Santiago, a Deputación da Coruña, o Ministerio de Cultura e Deporte a través do Inaem e a Fundación SGAE, pecha este domingo a súa trixésima edición.

'Galicreques 2025' poralle o broche de ouro á súa trixésima edición ás 20,00 horas no Teatro Principal de Santiago, cunha celebración que combina recoñecemento e espectáculo. A gala acollerá a entrega do 'Premio Galicreques', un momento para "recoñecer e celebrar o talento e a dedicación" de profesionais e compañías que manteñen viva a maxia dos monicreques.

A figura homenaxeada será Enkarni Genua, cofundadora do grupo Txotxongillo Taldea (1971) xunto a Manolo Gómez. Grupo pioneiro na posta en escena de espectáculos de monicreques en eúscaro, levando durante máis de medio século o teatro de marionetas por países, cidades, pobos e barrios.

Enkarni e Manolo colaboraron na posta en marcha do Titirijai, Festival Internacional de Monicreques, e na creación do TOPIC - Museo e Centro Internacional da Marioneta, en Tolosa.

ESTREA DE 'EPHIMEROS', DE NAUTA 
Como colofón, o público asistirá á estrea de 'Ephimeros', da compañía Nauta Teatro, un espectáculo multidisciplinar no que danza, máscaras e monicreques entrelázanse nun ritual poético e visual.

A protagonista, Nánua, unha osa polar feita de xeo, simboliza a loita pola supervivencia nun planeta ameazado polo impacto humano, nunha proposta cargada de beleza, sensibilidade e conciencia ecolóxica.