Plantar eucaliptos provoca que o nivel da auga baixe o dobre de rápido

Substituír pastos e cultivos por eucaliptos en terreos agrícolas é, ademais de ilegal, unha forma de acelerar as secas. Isto é o que se pode deducir dun varios estudos científicos realizados en Galicia e divulgados hoxe polos científicos de a  Sociedade Galega de Historia Natural.

Voluntaria arrincando eucaliptos durante as recentes xornadas deseucaliptizadoras convocadas ao hío do Día dos Bosques | Cousa de Raíces

DATOS CIENTÍFICOS

A investigación de  Rodríguez-Suárez, B. Soto , R. Pérez e F . Díaz-Ferros conclúe, segundo resume a SGHN, que "o cambio de uso alterou a hidrología na estación seca dunha pequena conca". En concreto, a análise publicada en Journal of Hydrology  en 2011 indica que "ao cabo de seis anos o nivel de capa freática baixaba o dobre de rápido que antes da plantación". 

Outro estudo científico dos mesmos científicos galegos asegura que "durante os 10 primeiros anos dunha plantación de Eucalyptus Globulus o caudal baixou nun 22%". A investigación publicada por Hydrological Processes explica que tal caída débese a "unha maior interceptación da choiva" na época seca e unha maior evaporación durante o verán.

"Os resultados de Rodríguez-Suárez et ao. (2011, 2014) mostran que as árbores de crecemento rápido e gran consumo de auga poden reducir a dispoñibilidade do recurso hídrico, sobre todo nos meses de verán e noutros períodos secos", sinala o artigo.

MILES DE PLANTACIÓNS ILEGAIS

Ante estas conclusións científicas, os científicos ambientalistas da SGHN reclaman á Xunta e ao Estado que cuantifiquen a "superficie agrícola transformada en plantacións de eucaliptos durante os últimos 25 anos", cada unha no seu ámbito competencial, Galicia na conca Galicia-Costa, o Estado na conca Miño-Sil.

O certo é que plantar eucaliptos ou calquera outra especie forestal está prohibido para todos os terreos que estean catalogados como de uso agrícola. A pesar de que é ilegal, e sancionable fai lustros, calquera que pasee polo campo coñece lugares nos que terreos de pastos ou cultivos son agora plantacións de piñeiros ou eucaliptos. 

En Galicia son poucos os que se atreven a denunciar aos seus veciños ante tales prácticas e, cando o fan os ecoloxistas, a miúdo a Xunta non actúa coa axilidade que requiren os procesos sancionadores. Ademais, o Goberno nunca lanzou unha campaña para denunciar motu proprio estas plantacións ilegais, a pesar de estaren a vista de todos.

O resultado é que o eucalipto segue gañando espazo no monte galego por encima da Lei. Para combatelo, a estratexia da SGHN empeza por esixir ás administracións que estuden se estas plantacións provocan a violación da lexislación, como a Directiva Marco da UE sobre a auga.