Os traballadores de ambulancias ratifican o acordo que pon fin á folga

Con só un voto en contra e catro abstencións de entre 315 sufraxios emitidos, os operarios de transporte sanitario ratificaron este mércores o preacordo dos sindicatos coa patronal. Ponse así fin a un conflito de moitos meses e que estivo a piques de entrar nunha folga indefinida.

Votación en asemblea | CIG

Haberá finalmente novo convenio colectivo, que inclúe unha mellora salarial. Os últimos flocos negociados esta semana -a estabilidade laboral e as condicións dos que traballan en prácticas- tamén reciben o visto e prace.

Salvo sorpresa, o novo convenio colectivo asinarase este xoves no Consello Galego de Relacións Laborais. Foi a través da súa intermediación como se desatascou o enconado conflito. Durante a folga houbo ducias de ambulancias saboteadas, moitas con pintadas e rodas picadas e polo menos dúas apareceron queimadas.

O PAPEL DE LA XUNTA E O NOVO CONCURSO

Unha das claves para a solución foi que a Xunta, finalmente, e a pesar de argumentar sempre que a Administración non era parte deste conflito, prometeu que habería máis diñeiro para as licitacións dos concursos de ambulancias. Os recortes destas adxudicacións deste servizo público xestionado por empresas privadas foi o principal argumento da patronal para rexeitar durante anos asinar un novo convenio coas melloras que demandaban os asalariados. 

Está por ver a cantidade pola cal se adxudican os novos contratos, en principio despois do verán, aínda que algunha das melloras terán efecto desde antes.