O PPdeG defende pactar con Vox, pero tamén con mareas, para gobernos municipais

|

Se o PP xa pactou cun partido que vén das mareas por que non vai pactar con Vox para formar gobernos municipais? Este é o argumento do líder coruñés Diego Calvo nunha entrevista na que tamén aborda o liderado de Casado e unha hipotética candidatura de Feijóo.


O presidente do PP da Coruña, Diego Calvo, mostrouse disposto a pactar con Vox nos concellos galegos tras as eleccións municipais que se celebrarán en maio xa que, segundo el, "o PP non fai cordóns sanitarios a ninguén".


Entrevista de Diego Calvo na Cadea SER

"Se hai que pactar con alguén e póñense encima da mesa unha serie de puntos e podemos converxer, facémolo. En Fene, un concello da ría de Ferrol, estamos a pactar no Goberno cun partido que é Somos Fene, que viña das Mareas. É máis, tivemos un problema inicialmente porque non lles deixaban a eles pactar connosco", sinalou Calvo nunha entrevista na Cadea SER recollida por Europa Press.

Neste sentido, asegurou que o seu partido "foi capaz de falar porque os máis importante eran os asuntos de Fene" e reprochou que "outros partidos non poden dicir o mesmo".

CRE QUE NON HAI XIRO Á DEREITA
Así mesmo, Calvo negou unha "dereitización do PP" e apuntou que o partido "segue dicindo o mesmo de sempre" e que "non cambiou nada".

"É verdade que apareceu outro partido máis á dereita do PP e para facer un cambio en Andalucía necesitamos os seus votos e así se fixo, pero non foi un pacto de goberno con eles porque non entraron no goberno", engadiu Calvo.

O presidente do PP da Coruña indicou que as próximas eleccións municipais non serán "unha proba de lume" para o seu partido pero explicou que servirán de "referencia" para mostrar "se as cousas están a facerse ben ou mal".

"Unhas eleccións municipais marcan unha tendencia e hai que fixarse nelas para aprender, para fixarse nos erros e corrixilos e para incidir nos aspectos bos", engadiu o diligente do PP.

FEIJÓO, "REFERENTE"
Preguntado sobre a posibilidades do presidente de la Xunta, Alberto Núñez Feijóo, para presentarse a unhas eleccións nacionais, Calvo defendeu o dereito do presidente do PP, Pablo Casado, a presentarse, a pesar do resultado que o partido obteña nas municipais.

"A verdade é que acabamos de ter un congreso hai poucos meses. Imaxino que ninguén está a pensar que alguén poida estar a pensar o contrario a día de hoxe. No Partido Popular, o señor Aznar antes de ser presidente presentouse a unhas eleccións e perdeunas, do mesmo xeito que Rajoy", sinalou Calvo.

Ademais, engadiu que Feijóo ten "moitas cousas que facer" xa que, segundo el, "quedan máis de dous anos como presidente de Galicia".

"Cando temos un presidente que consegue maiorías absolutas convértese nun referente e iso explica o agarimo que ten a figura de Feijóo en toda España por parte da xente do Partido Popular", indicou Calvo.

COMPETENCIAS
Pola súa banda, o presidente do PP da Coruña asegurou que "non hai contradición" na forma que o seu partido tratou o tema das competencias da comunidade autónoma.

"Estamos a dicir que en Galicia hai un teito competencial que está recollido na Constitución e no Estatuto de Autonomía de Galicia e que queremos chegar a el porque é o noso dereito e porque está recollido así", destacou Calvo.

CRÍTICAS AO CIS
Noutra orde de cousas, Diego Calvo criticou as enquisas do Centro de Investigacións Sociolóxicas (CIS), ás que cualificou de "broma".

"Parece unha broma. Unha cousa é que sempre houbo cociña, sempre se falou da cociña do CIS, pero nesta ocasión creo que máis que cociña é un aparello de propaganda", apuntou Calvo, quen sinalou directamente ao presidente do CIS, o socialista José Félix Tezanos.

Neste sentido, lembrou "os últimos fallos do CIS", xa que, segundo explicou, a enquisa situaba a Cidadáns como segunda forza política nas eleccións andaluzas e ao PSOE "moi preto" da maioría absoluta.

"Creo que as enquisas hai que velas con moita distancia. Deixando ao carón o tema do CIS, eu creo que estamos no bo camiño e de ser certo o CIS, o que ten que facer o presidente do Goberno, Pedro Sánchez, é convocar eleccións, e a día de hoxe non as convocou", sentenciou Calvo.

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Aviso legal Cookies Consello editorial Publicidade
Powered by Bigpress