O Celta cae en Vallecas botando máis en falta a Costas que a Aspas

Os de Cardoso sucumbiron por 4-2 ante o Raio Vallecano e suman tres tropezos seguidos e catro xornadas sen gañar.

O Celta perdeu por 4-2 en Vallecas / Foto: RC Celta

Segundo trompazo do Celta de Vigo en 2019. Os celestes caeron por 4-2 ante o Raio Vallecano, deixando de novo a imaxe de ser un equipo con graves problemas defensivos. En só cinco días, os vigueses deixaron escapar seis puntos e Cardoso perdeu o pouco crédito que acumulara. O técnico portugués segue sen dar coa tecla, e as lesións de Iago Aspas e Costas deixaron ao equipo sen referencia ofensiva e cunha defensa en cadros.

O naufraxio comezou aos catro minutos de partido, cando Raúl De Tomás executou brillantemente unha falta ao pau do gardameta para facer o 1-0. A reacción celeste, contra prognóstico, foi inmediata. En cinco minutos os galegos deron a volta ao luminoso, primeiro cun gol de Araujo á saída dun córner e logo cun tanto de Maxi Gómez desde os once metros.

Aos 17 minutos de partido o Celta estaba por diante do marcador, pero todo foi unha ilusión. Cabral volveu ser un pesadelo, pero para o seu propio equipo. O arxentino deixa fría á súa afección en cada acción que protagoniza. A punto estivo de cometer penalti sobre Embarba, pero o colexiado non sinalou o punto fatídico. Si sinalo fóra de xogo nun gol de De Tomás, e volveu invalidarlle outro tanto ao nove franjirrojo no minuto 36, pero nesta segunda ocasión o VAR emendou o erro do asistente e concedeu o 2-2.

No segundo tempo o Celta apertou un pouquiño e estivo máis enteiro que os vallecanos. Mesmo Maxi estrelou un libre directo no traveseiro, pero foi de novo De Tomás, que tiña os cabeiros afiados, o que deixou os tres puntos en casa cazando coa zurda un balón morto dentro da área celtiña. Faltaban pouco máis de dez minutos para o noventa, e o Celta apenas gozou de ocasións para darlle a volta de novo ao partido. Bebé redondeou a conta no engadido, superando a Rubén Branco no man a man e poñendo o definitivo 4-2.

Catro balóns que recolleu Rubén de dentro das porterías de Vallecas. Catro goles que deixan ao Celta moi moi tocado e instalado na zona baixa da táboa. Quedan dúas xornadas, en teoría, ata a volta de Aspas. Dúas xornadas nas que toca recibir a Valencia e visitar Valladolid. Con todo, non son poucos os afeccionados que miran o calendario, non para ver cando regresa o de Moaña, senón canto falta para a volta de Costas. O central non volverá ata marzo e o mercado termina o día 31. Quen o ía a dicir, pero o Celta bota máis en falta a Costas que a Aspas.

FICHA TÉCNICA:

Raio Vallecano: Dimitrievski; Advíncula, Velázquez, Ba, Amat, Álex Moreno; Comesaña, Imbula (Medrán, min 73); Embarba (Álvaro, min 60), Trejo (Bebe, min 72) e De Tomás.

RC Celta: Rubén Branco; Hugo Mallo, Cabral, Araujo, Juncà; Okay Yokuslu, Beltrán (Lobotka, min 77); Brais, Jozabed (Eckert, min 80), Boufal (Sisto, min 80) e Maxi Gómez.

Goles: 1-0, De Tomás, min 3; 1-1, Araujo, min 12; 1-2, Maxi Gómez, min 17; 2-2, De Tomás, min 36; 3-2, De Tomás, min 76; 4-2, Bebe, min 90.

Árbitro: Javier Alberola Vermellas, do comité castelán manchego. Amoestou a Ba, Advíncula e Velázquez (Raio Vallecano) e a Brais Méndez (RC Celta).

Campo: Vallecas.