Quen é Gabriel ‘Toro’ Fernández? O recambio de Maxi Gómez (VÍDEO)

O dianteiro uruguaio converterase no substituto de Maxi Gómez, que este verán abandonará Balaidos case con total seguridade. O dianteiro de Peñarol, sen experiencia en Europa, comparte moitas características co seu paisano.

O dianteiro Gabriel 'Toro' Fernández / Foto: CA Peñarol 

O Celta comezou a despedirse de Maxi Gómez. Un das fichaxes máis rendibles no referido a calidade-prezo da historia celtiña xa ten as maletas feitas para irse o verán que vén en busca de novas oportunidades. O uruguaio ten noivas en Madrid, Barcelona, Dortmund ou Pequín, polo que, salvo un inesperado xiro de 180º, Maxi Gómez está a vivir os seus últimos meses como celeste. E para facer esquecer ao charrúa, o Celta pensou nun paisano do ariete para que o cambio de cromos sexa menos doloroso: Gabriel ‘Toro’ Fernández.

Aínda que desde a dirección celeste apuntan que a chegada dun non está ligada á saída do outro, o certo é que a entidade olívica desembolsará preto de 5 millóns de euros no que será de xeito evidente o substituto de Maxi. Isto non quere dicir que non cheguen máis dianteiros, xa que con Aspas e Eckert o Celta necesita un fondo de armario maior para afrontar todo un curso.

A QUE XOGA ‘O TORO’?

Gabriel Fernández é un xogador que, saído das filas de Defensor Sporting como o seu homólogo Maxi Gómez, fíxose un nome en Racing Club de Montevideo para logo dar o salto a un histórico como Peñarol, onde agora lidera o ataque dos carboeiros, conquistando un Clausura, unha Supercopa e un trofeo ao máximo goleador en menos dun ano. Alcumado ‘Toro’, Fernández é o arquetipo do nove uruguaio: aguerrido, con envergadura e unha excelente definición.

Aínda que talvez Maxi sexa mellor no remate, Fernández é un dianteiro máis talentoso, con mellor condución e que se desenvolve moi ben con ambas as pernas, o que lle permite poder actuar desde os costados. Ambos viven ao límite do fose de xogo e comparten a garra e corazón que acompaña a todos os xogadores uruguaios. Con todo, mentres que Maxi abandonará Vigo sen cumprir 23 primaveras e debutando coa selección uruguaia, Fernández cumprirá este ano 25 anos, no mellor momento da súa carreira, pero sen vestir nunca a casaca nacional, soño que espera cumprir cando dea o salto a Europa.

En canto á súa chegada a Vigo, o xogador formará parte das filas celtiñas o próximo verán, salvo unha saída de última hora no ataque vigués neste mercado de fichaxes. Aínda que todo está encarrilado para o seu desembarco, a firma de Fernández queda supeditada a que supere o recoñecemento médico e de pequenos flocos que están a negociar Peñarol e Racing, os dous equipos que comparten o seu pase. Coa súa contratación, o Celta adiantouse a outros equipos españois, como Valencia e Betis, que estaban detrás dos pasos do de Montevideo, asegurándose non só contar cun rato da área, senón que ademais non reforza a posibles rivais. Se o de Peñarol dá tan bo rendemento como Maxi, ou polo menos ao metade, o Celta ten dianteiro para longo. 

Ademais de Fernández, o Celta tamén se terá que lanzar este xaneiro a por a contratación dun central. Costas estará un mes e medio de baixa, polo que o seu concurso farase esperar ata marzo aproximadamente. A isto, hai que sumar que Junior Alonso foise, Roncaglia está cun pié fose e que Cabral, no que Cardoso non confía, non vai renovar. Así as cousas, os celestes terán que moverse para traer un defensor. Quen sabe se repetirán formula e contratan a un central uruguaio. Así, vestindo a celeste do Celta, non botarán de menos a patria querida.