Así é Enrique Tenreiro, o escultor que pintou a tumba de Franco

O escultor Enrique Tenreiro, que pintou este mércores sobre a tumba do ditador Francisco Franco no Valle dos Caídos unha pomba con pintura vermella, é un artista coruñés especializado en 'performances'.

Na gravación do suceso obsérvase como Tenreiro, que fixo outras 'perfomances' no pasado, sitúase fronte á lápida e tras apartar as flores sobre a tumba de Franco debuxa con pintura vermella unha pomba da paz co lema 'Pola liberdade'. Ao ser detido por membros de seguridade, gritou "pola liberdade e a reconciliación dos españois, para que non haxa ningún bando vencido".

Tras ser reprendido polos visitantes da Basílica, o home respondeu: "Non estou en contra da unidade de España, pero Franco matou a moitísima xente".

ARTISTA DE PERFORMANCES

Tenreiro, de 49 anos, ten formación en técnicas de escultura e entre 1999 e 2004 estivo enrolado na escola Pablo Picasso de escultura da Coruña, aínda que a maioría de material na súa páxina web corresponde a distintas performances que veu realizando os últimos anos.

"Fago tolemias, pero iso non quere dicir que este tolo. É por provocar e para homenaxear a Duchamp", asegurou Tenreiro nunha entrevista en La Voz de Galicia en 2016. Entón unha das súas accións para criticar o malgasto da Cidade da Cultura de Santiago de Compostela saltou aos medios rexionais.

Tenreiro paseou pola praza de María Pita a peito aberto e cunha gran cruz ás súas costas, simbolizando o calvario. Con esta acción o creador quixo denunciar "a cruz" que supón a Cidade da Cultura "para a cultura en Galicia".

Ese mesmo ano noutra 'performance' no centro de Nova York sacou unha toalla e un bañador e tombouse sobre o asfalto.

En varias das súas esculturas e accións Tenreiro critica o papel da monarquía, e refírese aos Borbóns como 'bombones'. Na súa páxina web pódese visualizar as performances 'Demasiados bombones para este réxime" e 'A Coroa dos Bombones polos chans'.

TRADICIÓN FAMILIAR

O escultor provén dunha saga de artistas, entre os que destacan Antonio Tenreiro (1923-2006), un dos grandes artistas contemporáneos galegos e Jaime Tenreiro (1955-2018), que destacou como artista de vangarda.