Aspas salva a cabeza do ‘Turco’

O de Moaña comandou a vitoria celeste por 4-0 ante o Eibar cun hat-trick, amarrando os tres puntos despois de seis xornadas seguidas sen gañar. Brais Méndez redondeou a conta, evitando o cesamento de Tony Mohamed.

Aspas celebra un dos seus goles / Foto: RC Celta

Vitoria de prestixio do Celta de Vigo. O conxunto olívico luciu pegada ante o Eibar para levar a vitoria por 4-0 e espantar todas as pantasmas que rodeaban ao cadro de persoal de Mohamed, cuxa continuidade dependía de sacar un bo resultado ante o equipo armero. O partido estivo marcado polo hat-trick de Iago Aspas, que demostrou unha vez máis ser un dos futbolistas máis en forma do panorama nacional. Brais Méndez tamén viu porta, estreando a súa marcadora. Así, os celestes rompen a súa serie de seis xornadas sen gañar e afástanse da zona vermella da táboa.

O Celta, e máis concretamente os xogadores formados na Madroa, saíu ao campo decidido a dar unha alegría a Balaidos. Aos cinco minutos, e despois dun primeiro achegamento de Boufal, Aspas abriu o marcador cunha espectacular vaselina á que non puido chegar Risco. O dez celeste, que vén de celebrar o nacemento do seu segundo fillo, non puido atopar unha mellor maneira de festexar a chegada ao mundo da súa nena, Miña. ‘O Príncipe’ volveu fregar a lámpada máxica á media hora de xogo, facendo o 2-0 con outra espectacular parábola ao segundo pau, obrigando ao recinto celtiña a levar as mans á cabeza unha vez máis. Entremedias, o Eibar gozara de boas ocasións para tentar equilibrar a balanza, topándose coa mellor versión do ‘Gato de Catoira’, Sergio Álvarez.

O plan do ‘Turco’ funcionou que dá xenio contra prognóstico, mantendo a portería a cero e demostrando puntería para gol, xa que o Eibar puxo contra as cordas ao Celta en máis dunha ocasión. Con todo, houbo máis boas noticias, como que Lobotka empeza a parecerse a aquel centrocampista que marabillou ao mundo a tempada pasada, ou que Emre Mor, titular, asinou un partido solvente, e que Brais Méndez fixo o seu primeiro gol do curso. Era o 3-0, deixando abatido ao Eibar, que se foi por completo do partido cando Arbilla fallou unha entrega ao seu porteiro. Do regalo Aspas fixo o seu terceiro gol e selou un triunfo balsámico para o cadro vigués.

O asubío final dá outra oportunidade ao proxecto do técnico arxentino e pon terra polo medio entre o Celta e a zona baixa da táboa. Un triunfo que debería levar tranquilidade ao persoal e á cúpula celeste. Entre semana o partido de Copa do Rey ante a Real Sociedade. Bo momento para medir se o vivido o sábado foi un espellismo ou se o Celta empeza, por fin, a remontar o voo. 

FICHA TÉCNICA:

CELTA: Sergio, Hugo Mallo, Roncaglia, Cabral, Juncà, Beltrán, Lobotka, Brais Méndez, Emre Mor (Okay, min.74), Iago Aspas (Dennis, min.85), Boufal (Sisto, min.81).

EIBAR: Risco, Bigas (Cucurella, min.68), Cote (Sergio A., min.68), Pena, Arbilla, Diop, De Blasis, Orellana, Jordán, Sergi Enrich (Charles, min.57), Kike.

Goles: Iago Aspas (1-0, min.5), Iago Aspas (2-0, min.36), Brais Méndez (3-0, min.56), Iago Aspas (4-0, min.82).

Árbitro: González González, do comité madrileño. Sen amoestados.

Campo: ABANCA Balaídos (15.509 espectadores).