Os '19 de Meirás' urxen ao Goberno para reclamar o pazo

Os activistas, denunciados pola familia Franco por un acto reivindicativo realizado no Pazo de Meirás, reclamaron nunha manifestación que o Goberno central "non dilate máis a cuestión" e presente a demanda civil para solicitar a devolución do inmoble ao patrimonio público.

Membros dos '19 de Meirás' na manifestación

Así o dixo o portavoz do colectivo, Néstor Rego, en declaracións aos medios ás portas dos Xulgados de Betanzos, onde estaban chamados a declarar os 14 activistas que faltaban por comparecer ante o xuíz por mor da denuncia presentada polos Franco.

Para Rego é "unha esixencia democrática terminar con os privilexios herdados do franquismo". "Non só hai que sacar a Franco do Val dos Caídos, se non que hai que eliminar os restos do franquismo de todos os ámbitos nos que aínda perduran", dixo o portavoz.

Para o colectivo, "é necesario e posible que o Pazo de Meirás pase a ser patrimonio público, só é cuestión de vontade política", polo que reclaman "a todas as forzas políticas estatais, especialmente ao PSOE, xa que está á fronte do Goberno do Estado, que non dilaten máis esta cuestión e de inmediato presenten a demanda civil para que o Pazo de Meirás pase ao patrimonio público".

CARÁCTER "SIMBÓLICO"

Do mesmo xeito, Néstor Rego volveu a reivindicar o "carácter simbólico e pacífico" da acción pola que están denunciados os 19 activistas, que permitiu "reactivar o debate social e político sobre a recuperación do Pazo, metelo na axenda política galega e obrigar ás institucións públicas a manifestarse ao respecto". "Se hoxe fálase tanto de Meirás, da Casa Cornide, das estatuas de Abraham e Isaac é grazas a accións como esta, o que demostra a súa utilidade e necesidade", explicou durante unha concentración de apoio.

En relación coa denuncia presentada pola Fundación Francisco Franco e a familia do ditador, Rego criticou que estean "a tentar criminalizar o exercicio ao dereito democrático á liberdade de expresión", algo que considera "inadmisible".