​Olga Louzao: “Eu son a primeira que defendo o galego”

En declaracións a Galiciapress, a líder de Cidadáns en Galicia apoia as palabras de Toni Cantó e , asemade, promete que o partido laranxa aposta por promocionar o galego. Olga Louzao responde así a a polémica intervención do seu compañeiro, deputado no Congreso, onde dixo que “é un feito que o castelán desapareceu de Galicia”.

Díxoo, ademais, defendendo unha proposición non de Lei que convertería ao galego nun simple mérito e non nun requisito para acceder ao funcionariado na Administración en Galicia. Esta de acordo Cs Galicia con esta proposta?

Louzao busca un difícil equilibrio. A concelleira luguesa argumenta -como Cantó- que é necesario que os galegos poidan presentarse a unha praza da Generalitat ou da Administración vasca aínda que non saiban a lingua cooficial. “Que sexa un mérito, pero que non sexas excluído”, razoa.

DEBEN OS FUNCIONARIOS EN GALICIA SABER GALEGO?

Para presentarse a funcionario do Estado xa non é necesario saber ningún idioma autonómico, nin sequera cando -lograda a oposición- destínante a Galicia, Cataluña ou País Vasco. Os funcionarios do Estado en Galicia non teñen porque saber galego, aínda que despois a Administración Central teña a obrigación legal de responder en galego (ou catalán, ou vasco) se o cidadán desa autonomía o solicita.

A cuestión cambia coa Administración Galega, onde o idioma propio case sempre é un requisito -e non un simple mérito como pide Cidadáns- para garantir o dereito da ciudanía galega -dereito que figura explicitamente no Estatuto de Autonomía- a poder usalo.

O PP SÚMASE A UNHA PROPOSTA QUE EN APARENCIA CHOCA COA POLÍTICA DO PPDEG DESDE A ERA FRAGA

Cando se lle argumenta que a proposta de Cantó abriría as portas a que, por exemplo, un profesor do sistema público galego ou un médico de familia do SERGAS atendese a cidadáns sen coñecer a lingua do país, Louzao puntualiza que o que levou Cantou ao Congreso era unha mera proposta, que posteriormente se matizaría nun trámite “moito máis longo”.

Non se matizará, porque a proposta só sumou o apoio do PP (a pesar de que contradi de fronte a política de normalización lingüística que os conservadores levan anos dicindo aplicar en Galicia), polo que foi tombada de primeiras. Ademais, circunscribe a proposta a “un ámbito puramente administrativo”.

C'S GALICIA DI APOIAR A PROMOCIÓN DO GALEGO

Louzao reclama “non sacar as cousas de contexto” e mostra unha clara actitude de apoio á lingua autonómica. “Eu son a primeira que defendo o galego”, di, pero reclama que “o idioma non sexa motivo de exclusión”. Á vez, denuncia que os galegofalantes non están a aumentar senón que por desgraza están en retroceso. A política asegura que é obrigación das administracións, ante esta caída de falantes, promocionar a lingua do país.

Fronte ás numerosas críticas, Louzao di que “unha parte importante da xente que atacou a Toni por este tema quere crear un conflito que non existe en Galicia, por sorte, falamos galego e castelán con absoluta liberdade”. Ademais, asegura que o propio Cantó  xa as matizou.

“Que Cidadáns quere acabar co galego non é certo”, conclúe.