A onda de calor obriga a suspender as visitas ao Pórtico da Gloria

Centos de turistas facían cola abrasándose no Obradoiro estes días para ver a obra mestra do Mestre Mateo, algo que sufrían tamén os vixiantes de seguridade.

As visitas ao Pórtico da Gloria da Catedral de Santiago quedaron suspendidas ata novo aviso por culpa da onda de calor que afecta a Galicia desde o pasado xoves.

Segundo informou a Fundación Catedral desde a súa conta de Twitter, as visitas quedaron suspendidas desde as 19,00 horas deste venres.

Cando se cumpre unha semana da súa apertura ao público en xeral, a Fundación cancelou as visitas por motivos de conservación debido ás variacións climáticas nun venres no que os termómetros alcanzaron os 38 graos na capital galega.