Os axentes forestais e ambientais convocan folga

Tras anos de protestas, os axentes ambientais e forestais da Xunta dan un paso adiante e convocan varias xornadas de folga. Se non hai avances, o paro podería ser definitivo desde agosto, en plena tempada de alto risco de incendios.

Unha circunstancia moi relevante, xa que parte deste colectivo é o encargado de coordinar a extinción de incendios no monte.

Segundo o preaviso formalizado xa por CIG e UXT, a folga comezará o día 25 ata o 27 de xullo, ás 8 horas, e, a partir de 1 de agosto, desde media noite, terá unha duración indefinida, afectando á escala de axentes forestais/facultativos ambientais, que son funcionarios e funcionarias ao servizo da Administración Autonómica galega.

PETICIÓNS DOS TRABALLADORES

Os traballadores buscan que a Xunta retroceda na súa pretensión de "imposición dun aumento horario e dun empeoramento das condicións de traballo" para adecuar a xornada máxima anual ao do resto empregados públicos.

Os folguistas demandan "unha compensación económica acorde ao carácter extraordinario dos seus horarios e un complemento específico que retribúa a penosidade, toxicidade, traballo por quendas e especial responsabilidade deste persoal en concordancia con outro persoal da Xunta con características funcionais semellantes".

Os sindicatos aseguran que as conversacións previas fracasaron porque a Administración puxo tantos impedimentos que, na práctica, non se chegou a negociar. Por parte da Xunta, aínda non hai resposta pública a esta convocatoria.