Gran tormenta de saraiba deixa sen luz o hospital de Ourense

Así empezaba a #tormenta en #Ourense #saraiba pic.twitter.com/M30M7XPWFx

— Patricia Martínez (@diecisietecosas) 13 de xullo de 2018

Unha forte tormenta con saraiba caída na tarde deste venres en Ourense deixou sen luz o Complexo Hospitalario da cidade durante uns minutos e colapsou o funcionamento do 90 por cento dos semáforos.

Segundo fontes do hospital, a caída do servizo "apenas se notou" e non causou incidencias maiores, xa que o edificio conta con xeradores autónomos e un sistema de alimentación ininterrompida para cubrir as áreas de servizos críticos como os quirófanos.

Con todo, xa se restableceu a normalidade total nas instalacións tras ser evacuada dun ascensor unha persoa por parte de operarios de seguridade e mantemento do complexo sanitario.

Así mesmo, a tormenta, que se prolongou durante uns 10 minutos, deixou sen funcionar o 90 por cento dos semáforos da cidade, os cales están a ser restituídos por traballadores do concello.

Ademais, a forte tormenta provocou dous incendios: nunha vivenda por mor da caída dun raio, que non deixou danos humanos e foi sufocado poucos minutos máis tarde de producirse, e nun transformador da Comandancia da Garda Civil, extinguido por efectivos do Corpo de Bombeiros de Ourense.