A TVG defende a súa cobertura informativa sobre a Mina de Touro

O director xeral da CRTVG, Alfonso Sánchez Izquierdo, defendeu este venres no Parlamento que existen fotografías que demostran que "non é certo" que os informativos da televisión pública omitiesen a manifestación que reuniu a miles de persoas en Santiago para reclamar a paralización do proxecto mineiro de Touro-O Pino.

Así, durante a súa comparecencia na Comisión de Control da CRTVG, Sánchez Izquierdo comparou estas acusacións coas que xurdiron sobre o cobertura da sentenza do caso Gürtel e incidiu que "está probado que a duración da información foi de cinco minutos e dez segundos".

Segundo recolle un comunicado emitido este venres pola CRTVG, o director xeral presentou na comisión a 'Memoria de Servizo Público 2017', que recolle o resumo das accións que a corporación levou a cabo o ano pasado.

Respecto diso, subliñou que a canle realizou unha "profunda reestruturación interna", co fin de dixitalizar a empresa e que se pretende completar para o outono deste ano, para o que os seus traballadores recibiron formación durante 20.000 horas.

LIDERADO DE INFORMATIVOS
Así mesmo, Sánchez Izquierdo destacou que, segundo o último estudo da FORTA, a Televisión de Galicia é "a canle con maior impacto de España, xa que un 30% dos galegos maiores de catro anos escollen diariamente a Televisión de Galicia". Tamén sinalou que a TVG terminou 2017 cunha audiencia do 10,4% (só por detrás de TV3, entre as canles autonómicas).

Así mesmo, subliñou o "liderado" dos seus informativos, cun 20% de audiencia na franxa do mediodía" e que "xunto coa 1, TVG é a única das grandes canles que mellorou os resultados con respecto ao ano anterior".

Sobre a Radio Galega, Sánchez Izquierdo resaltou, segundo o último EGM, o número de oíntes da emisora pública elevouse ata os 157.000. Ademais, a Radio Galega Música sitúase no terceiro valor máis alto da súa historia, segundo a organización.

Con estes datos, Sánchez Izquierdo negou as "acusacións de desmantelamento" do servizo público da Radio Galega. Doutra banda, referiuse ás protestas dos traballadores da canle e afirmou que esas manifestacións son respectadas pola dirección da CRTVG.