Máis de 1.470 firmas en dous días nunha petición contra a mina de Touro

Paralelamente a o aluvión de firmas entregadas pola Plataforma Mina Touro - O Pino Non á Xunta de Galicia este mércores, a propia asociación creou unha petición na internet na plataforma Change.org, a cal, en apenas dous días, alcanzou máis de 1.470 firmas. 

"O movemento veciñal contrario ao proxecto conseguiu o apoio de 140 asociacións, 33 concellos, 2 deputacións, máis de 26.000 firmas en papel e unha manifestación histórica que percorreu as rúas de Santiago o pasado 10 de xuño", explica o texto que acompaña á petición. 

Así mesmo, a acción online está acompañada dun novo vídeo de Mina Touro - O Pino Non realizado polas colectivo Lentes Diverxentes. "Fai agora cinco anos xa falabamos disto. A rede de megaminería tecíase sobre Galicia. Entón, chamábase Corcoesto. Hoxe a ameaza está sobre O Pino e Touro... de momento". Así empeza o anuncio que quere explicar as consecuencias da megamina de cobre. 

UN PROXECTO "INVIABLE"

Así as cousas, este mércores o conselleiro de Economía, Emprego e Industria, Francisco Conde fixo unhas declaracións que supoñen un duro golpe para a empresa mineira Atalaia Mining. Conde expuxo que "tal e como está pensado" o proxecto, "non é viable". 

A pesar diso, o conselleiro anunciou que a Xunta "seguirá analizando todos os informes" para pronunciarse "cando acabe a tramitación", e que a decisión "non está tomada".