O servizo de oncoloxía do CHUS recibe a máxima certificación internacional
O servizo de oncoloxía do Hospital Clínico de Santiago de Compostela foi recoñecido pola Sociedade Americana de Oncoloxía Clínica (ASCO)
Equipo de Oncoloxía do CHUS
O servizo de oncoloxía do Complexo Hospitalario Universitario de Santiago (CHUS) recibiu o certificado de calidade asistencial en cancro da Sociedade Americana de Oncoloxía Clínica (ASCO). Coa Certificación do Programa QOPI, que é o máximo recoñecemento internacional en calidade, convértese no cuarto hospital español recoñecido pola ASCO.
O programa de avaliación da calidade asistencial mide as prácticas asistenciais, a organización, estrutura, recursos materiais e humanos, procesos, planificación do tratamento, capacitación e educación do persoal, administración segura de quimioterapia e seguimento e avaliación do benestar do paciente, ente outros parámetros.
"Ao lograr a certificación, demostramos o compromiso de todos os profesionais do servizo de oncoloxía coa calidade e a seguridade na atención que prestamos aos pacientes, así como ao proceso continuo de mellora", apuntou o Doutor López do Clínico.
O obxectivo do servizo do CHUS é "conseguir que o paciente reciba a atención o máis preto do seu lugar de residencia e permaneza no seu domicilio todo o tempo posible", segundo explica o Sergas. Así, "facilítase" a atención intrahospitalaria e a coordinación entre niveis asistenciais.
Escribe o teu comentario