O Son do Camiño en imaxes

Imaxes: Eva Neira Carballo

O Son do Camiño marcou un antes e un despois nos festivais de Galicia. Afeitas a espectáculos modestos con gran presenza de grupos locais, o Monte do Gozo anoiteceu este fin de semana con máis de 30.000 asistentes.

O cartel era potente, con artistas internacionais da talla de The Killers, Jamiroquai ou Lenny Kravitz, aínda que non foron os únicos que conseguiron abarrotar o recinto. Os concertos de Franz Ferdinad, Two Door Cinema Club, Residente ou Mando Diao resoaron no escenario rodeados de miles de persoas coa mesma forza con a que o fixeron nacionais como Carlos Sadness, Leon Benavente, ou A M.Ou.D.A. 

A pesar dos prexuízos que puidese supoñer o gran cartel e o evento en xeral -"un festival de modernas"-, o público de O Son Do Camiño era completamente heteroxéneo e bailaba coas mesmas ganas ao ritmo dos pratos do holandés Martin Garrix, coa guitarra de Kravitz ou coas rimas de Arce. 

Gusten máis ou menos as confirmacións, non hai lugar a dúbidas que o cartel deixa bastante que desexar en igualdade. A verdade é que entre os rostros femininos sobre o escenario contábanse cos dedos de as mans, e ningún dos nomes máis rechamantes era de muller. 

Así as cousas, o espazo acompañou ao formato do festival, podendo gozar da música sen apenas darche conta de que estabas nun mar de miles de persoas -se así o desexabas-. Onde si se notou a afluencia foi nas grandes colas para chegar e saír do recinto, cunha deficiente organización do transporte o xoves, mellorada o sábado e que deixou o domingo a miles de asistentes sen transporte para volver á cidade, con miles de persoas andando a última etapa do Camiño de Santiago ás 4 da madrugada, tras suspender o servizo de autobuses de volta.