O Sindicato de Enfermería condena a 'normalización' do peche de camas no verán

O Sindicato de Enfermería SATSE en Coruña denuncia o peche sistemático de camas no Complexo Hospitalario Universitario A Coruña no período estival. A organización emitiu un comunicado de condena ante o peche total ou parcial dalgunhas unidades, e "todo o que iso leva". 

Desde o sindicato advirten que o peche de camas afecta a profesionais de enfermería, así como ao resto do persoal sanitario e ás e os pacientes, que sufrirán "sen necesidade unha diminución na calidade asistencial". 

"Esta deción supón sobrecarga asistencial para unhas profesionais xa en mínimos, precariedade innecesaria nas unidades e falta de sensibilidade", subliña o sindicato. Expoñen que o peche de camas do CHUAC deixa a "unha soa enfermeira" na quenda de noite "a cargo de 14 pacientes en ou servizo tan complicado como é o Otorrino, con gran risco de sangrado e a necesidade de estar en alerta permanente".