Persoal de ambulancias négase a facer o labor dos celadores do SERGAS

Desde este venres, o cadro de persoal  do transporte sanitario non urxente na comarca de Ou Salnés non trasladarán aos pacientes desde as ambulancias ata o interior do hospital comarcal para distribuílos nas distintas consultas. 

Así denuncian que "o Sergas está a suplir a carencia de celadores no centro sanitario obrigando aos traballadores para asumir unha función para a que non recibiron formación específica". Van máis aló e aseguran que este recorte está  "poñendo en perigo a saúde das persoas que transportan"

OS RECORTES EN AMBULANCIAS PASAN FACTURA

A raíz do problema parece ser, unha vez máis, de índole económica, causada polos recortes e o axustado da última licitación do servizo privatizado. “A empresa di que non pode poñer máis persoal porque economicamente non é viable, e mentres o hospital aforra en celadores. Levamos dous anos denunciando esta situación, e o propio xerente comparte a nosa queixa e di que temos toda a razón, pero parece que queren aforrar diñeiro á costa deste hospital e da poboación do Salnés”, explicou en rolda de prensa o sindicalista Xavier Aboi.

Este conflito é unha mostra máis das consecuencias dos recortes nas adxudicacións das ambulancias do SERGAS, sector no que hai convocados varios paros. No caso concreto da licitación das comarcas de Pontevedra e O Salnés, a CIG denuncia que desapareceron “por encantamento” 150.000 euros, o que está provocar problemas económicos á empresa, facendo que non se cubran postos de traballo necesarios.

NON DEIXARÁN SÓS AOS PACIENTES

Este sindicalista da CIG indica que a única saída que queda ao persoal é deixar de facer esta función" por responsabilidade cos enfermos" . “Cando levamos un paciente en padiola e outro en cadeira, por exemplo, e mentres baixamos un o outro queda só na ambulancia esperando. E estamos obrigados a apagar a ambulancia e pechala, e iso nun día de verán con máis de 30 graos é contraproducente para os pacientes”,argumentan.

Iso si, os traballadores non abandonarán ás persoas ao seu cargo senón que esperarán na porta acompañándoos. "Non os imos a deixar na porta e marchar, o que non imos facer é distribuílos nas consultas ou nos departamentos aos que se dirixe", indican.