Os gobernos de esquerdas resistirían en case todas as cidades

Os gobernos locais das principais cidades galegas manterían case intactos os seus apoios, cun escaso desgaste en comparación con 2015 e unha leve subida de Cidadáns, segundo as enquisa realizada por Sondaxe para La Voz de Galicia a un ano das eleccións municipais.

Segundo a estimación publicada, o panorama municipal das cidades de Galicia seguiría caracterizado polo dominio incontestable do PSOE en Vigo e a hexemonía do BNG en Pontevedra, así como a resistencia dos actuais alcaldes das mareas da Coruña e Santiago --Marea Atlántica e Compostela Aberta--.

O barómetro situaría ao PSOE de Lugo, que goberna na actualidade, con case os mesmos resultados, do mesmo xeito que ao PP de Ourense, e sitúa os cambios máis probables en Ferrol, onde o PP, co apoio de Cidadáns, podería desbancar ao actual goberno da marea, de Ferrol en Común.

Por cidades, Sondaxe prevé que o socialista Abel Caballero consolide a súa maioría absoluta en Vigo con 17 concelleiros, aínda que con tres puntos máis en porcentaxe de voto, mentres que o PP baixaría de 7 a 5, e a Marea pasaría de 3 a 4.

En A Coruña, o rexedor Xulio Ferreiro, de Marea Atlántica, conseguiría frear o envite do centro dereita aínda que pasando dos 10 edís actuais a 9 en 2019. Sondaxe perfila un escenario no que o PP tamén perdería un concelleiro, quedándose en 9, con Cidadáns rendibilizando esta baixada, ao obter 2 representantes, e co PSOE quedándose de novo con 6.

En Santiago, Martiño Noriega, que lidera a alcaldía con Compostela Aberta, podería revalidar o seu goberno local, porque os 9 edís que lle prognostica a enquisa chegarían a ser 15, cun hipotético apoio dos 4 do PSOE e os 2 do BNG. A balanza quedaría así ao seu favor, ao sumar PP (9) e Cidadáns (1) tan só dez. En catro anos, iso si, perdería un representante e dous puntos en intención de voto.

A situación de Ourense, na actualidade con alcaldía do PP en minoría, volvería mostrar igual de complexa. O exconselleiro e alcalde Jesús Vázquez non conseguiría rendibilizar o poder e repetiría con 10 edís. Tampouco habería demasiados cambios en PSOE (7) e Ourense en Común (8), pero a posible irrupción de Cidadáns con 1 edil podería contribuír a estabilizar a situación a favor do PP.

En Lugo, cidade con alcaldía socialista durante anos, a rexedora Lara Méndez deixaríase un edil e cinco puntos e medio, aínda que o PP, que seguiría sendo a forza máis votada, tamén quedaría cun concelleiro menos. A situación de Lugo tornaríase así bastante complexa, ante a presenza de Cidadáns con 4 edís, Lugonovo con 2, Alternativa Cidadá con outros tantos e o BNG, igualmente, con 2.

As dúbidas non existen en cambio, segundo a enquisa de Sondaxe, sobre o futuro do goberno local de Pontevedra, onde o BNG e o seu alcalde, Miguel Anxo Fernández Lores, poderían afrontar a súa quinta lexislatura con tranquilidade, aínda que, de novo, sen maioría absoluta.

Finalmente, en Ferrol, aínda que o actual goberno da marea de Ferrol en Común practicamente non baixaría en apoios e quedaría con 6 edís, o mantemento con 11 do PP e a subida a 2 de Cidadáns podería levarlle a perder a alcaldía, a favor dunha coalición de centro dereita.