Peche de campaña dos candidatos ao reitorado da Universidade de Vigo

Os candidatos Emilio Fernández e Pachi Reigosa, respectivamente | Imaxe: UVigo

O vindeiro luns 23 de abril, ao redor de 20.300 integrantes da UVigo están chamadas a votar. Emilio Fernández, por Ideas que Suman, e Pachi Reigosa, por H2040, son os candidatos para ocupar o cargo de reitor da Universidade de Vigo durante o próximos catro anos. 

O candidato de Ideas que suman escolleu o xoves 19 a Escola de Enxeñería de Telecomunicación como escenario para o seu peche de campaña, mentres que o aspirante de Horizonte2024 decantouse pola Escola de Enxeñería Industrial. Ambos estaban acompañados de parte dos seus equipos de gobieno e fixeron balance do traballo levado a cabo durante as últimas semanas.

A principal mensaxe que chegou aos candidatos durante a campaña é claro. Fernández e Reigosa coinciden en que a demanda de diálogo lidera as peticións da comunidade universitaria, que busca ser escoitada e ver as súas preocupacións atendidas. 

Fernández aproveitou o peche de campaña para pedir o voto ás persoas indecisas presentándose como a alternativa que tentará "abordar os problemas do presente, pero sobre todo deseñar a universidade do futuro". Reigosa, pola súa banda, apelou ás posibles votantes buscando voces discrepantes nos órganos de goberno e negociación. "Se pensan que a nosa aposta pola universidade das persoas, por incrementar o número de persoas e a calidade dos postos de traballo é boa, que nos voten a nós", dixo o candidato.