O BNG defende unha proposición de lei para mellorar a Atención Primaria con 223 millóns de euros
A portavoz parlamentaria de Sanidade, Montse Prado, defendeu a proposta do Bloque Nacionalista Galego para "sufragar un plan de mellora urxente" da Atención Primaria, "a gran damnificada das políticas de recortes, desmantelamento e privatización da sanidade pública do PP".
A portavoz de Sanidade, Montse Prado | Imaxe: BNG
O BNG propón un plan urxente de 223 millóns de euros para mellorar a Atención Primaria (AP). A portavoz parlamentaria de Sanidade, Montse Prado, defendeu a proposición de lei sostendo que é a porta de entrada ao sistema. "A atención primaria está afogada, colapsada, non é resolutiva e iso deriva en fragmentación do sistema", declarou a portavoz.
A proposta das nacionalistas baséase nunha dobre vía de financiamento. Por unha banda a formación expón un incremento do IRPF ás rendas máis altas, unha rebaixa da exención de pago do imposto de patrimonio desde os 700.000 euros aos 300.000 e a imposición dun imposto de nova creación ás grandes superficies, que "permitirían recadar 135 millóns de euros". Por outra banda, propoñen modificar as partidas orzamentarias, que "sumarían 92 millóns".
O grupo parlamentario busca así atallar "a masificación das consultas con profesionais con cotas moi por encima dos ratios marcados, a falta de substitucións", así como as "listas de espera e axendas pechadas consultas que quedan desatendidas cando as profesionais teñen que atender urxencias fose do centro".
Escribe o teu comentario