PuntoGal e a Real Academia Galega premian cinco microrrelatos

Xa hai gañadores do concurso de microrrelatos organizado pola Real Academia Galega (RAG) e PuntoGal. O obxectivo, promocionar o uso do galego na internet.

O primeiro premio, seleccionado entre case 400 relatos, foi para Silvia Camesella Gesteira, natural de Nigrán (Pontevedra). O seu texto, titulado 'Odio as mans frías', foi o mellor valorado polo xurado na xunta mantida na sede da RAG.

Héctor Cajaraville Araújo (Santiago de Compostela) foi recoñecido co segundo premio por 'O milagre' e Ceres Serea Manso Acuña (Nigrán) conseguiu un terceiro premio con 'Cousas que pasan'. Outros dous terceiros premios son para Nee Barros Fernández (Marín), de 15 anos, por 'Desexo concedido', e Teo Alonso Vidal (Vigo), de 10 anos, por 'Unha hora'.

O xurado, composto polo presidente da Real Academia Galega, Víctor F. Freixanes; o presidente de PuntoGal e académico Manuel González; a escritora e académica correspondente Helena Villar Janeiro; o director xeral de PuntoGal, Darío Janeiro; e a poeta, editora e membro do comité de redacción de Luzes, Dores Tembrás, avaliou os case 400 relatos. Os cinco gañadores impuxéronse nunha lista de 14 finalistas.