Podemos irá ás eleccións de Pontevedra co seu propio nome

As bases do Círculo de Podemos en Pontevedra apoiaron cun 82,91% dos votos emitidos a proposta do secretario xeral, Pablo Iglesias, para acudir ás eleccións municipais coa marca da formación morada.

Esta consulta foi valorada de forma positiva este martes polos membros do Círculo Podemos Pontevedra, a deputada no Congreso Ángela Rodríguez e o parlamentario autonómico Marcos Cal.

Tras a consulta e seguindo o mandato dos inscritos, nas próximas semanas o Círculo Podemos Pontevedra iniciará negociacións con distintos actores na procura dunha fronte ampla co que afrontar as próximas citas electorais. Ademais, o círculo tamén prevé elixir ao seu portavocía en próximas datas.

XUNQUEIRA DE ALBA
Na rolda de prensa, o Círculo Podemos Pontevedra denunciou o "novo ataque" que podería sufrir o Espazo Natural de Interese local Xunqueira de Alba se leva a cabo a construción prevista dunha área comercial no Vao. Fronte a iso, presentará alegacións no prazo previsto pola administración local.

A inmobiliaria Ponteno, do Grupo Nogar, leva máis de quince anos tramitando a ampliación do polígono comercial e empresarial do Vao, á beira da autoestrada AP-9 e da estrada entre Pontevedra e Vilagarcía a PO-531.

Nestes días finaliza o prazo aberto pola Dirección Xeral de Comercio para conceder a autorización que, xunto ao permiso de Costas para facer o aparcadoiro, son trámites necesarios para que a promotora desta área comercial poida solicitar a licenza municipal para iniciar as obras de construción dun parque con 15.140,56 metros cadrados edificables.

A inmobiliaria Ponteno informou do interese por instalarse neste emprazamento das marcas Decathlon, Norauto, Vegalsa-Eroski, Aki e JYSK.