O rapero Valtonyc forma parte do cartel do Festigal 2018 en defensa da liberdade de expresión

O rapero Valtonyc participará na programación do Festigal 2018 para reivindicar a liberdade de expresión e "contra a involución democrática provocada pola lei mordaza e a represión contra o activismo social, político e sindical e o independentismo catalán".

A organización deste festival, que celebra os seus concertos o día 24 de xullo, na véspera do Día de Galicia, anunciou este nome para o seu cartel a través dun comunicado de prensa.

De forma paralela, a través das redes sociais, colgou un vídeo gravado polo propio Valtonyc no que este agradece a invitación aínda que recoñece que "a día de hoxe" non sabe "se poderá ser" porque "seguramente" xa estará en prisión.

👉 1ª CONFIRMACIÓN: VALTÒNYC👇👇👇

O #Festigal2018 súmase á onda en defensa dá liberdade de expresión en solidariedade co rapeiro maiorquín Valtònyc, estará no cartaz desta nova edición do Festigal! #ValtònycFestigal #Nonnoscalarán@obloque @galizanova @galizasempre pic.twitter.com/4GzSEm5KG6

— festigal (@festigal_) 27 de marzo de 2018

"Se non puidese ser, mándovos todas as miñas forzas na loita", sinala no vídeo o rapero Josep Miquel Areas, coñecido como Valtonyc, cuxa defensa anunciou nos pasados días que presentará alegacións para pedir a suspensión da pena de tres anos de cárcere á que foi condenado por delitos de enaltecemento do terrorismo, calumnias e inxurias graves á Coroa, e ameazas polo contido dalgunhas das súas cancións.

O balear ten 14 discos publicados con letras de ideoloxía anticapitalista, republicana e antifascista. O Festigal súmase así á trintena de festivais, entidades e salas que expresaron "o rexeitamento a esta vulneración do dereito á liberdade de expresión" e que acordaron incluír nas súas programacións concertos de Valtonyc, "como maneira de solidariedade, ante a involución democrática do Estado español".